Dedfrydu tri am yrru car at bobl ar brom Aberystwyth

Mae tri dyn wedi eu dedfrydu yn dilyn digwyddiad "gwarthus" pan gafodd car ei yrru at gerddwyr ar bromenâd Aberystwyth.

Cafodd un cerddwr ei anafu yn y digwyddiad ar Marine Terrace yn oriau man bore Sadwrn 5 Hydref, 2019.

Dangosodd fideo o'r digwyddiad y car gwyrdd yn gyrru ar gyflymder a rhwng cerbydau eraill tuag at bobl.

Roedd y tri dyn, Richard Allen, 31 o Birmingham, Darren Dragoonis, 35 o Birmingham, a Jack Smith, 27 o Solihull, wedi pledio'n euog i achosi ffrwgwd.

Cafodd fideo o'r digwyddiad ei rannu ar gyfryngau cymdeithasol ar y pryd

Yn ogystal, fe wnaeth Allen gyfaddef achosi niwed i gell heddlu a thorri amodau mechnïaeth, ac fe gafodd ddedfryd 22 mis wedi ei gohirio am flwyddyn.

Roedd Smith hefyd wedi cyfaddef bod â chyffur dosbarth B yn ei feddiant, ac fe gafodd ddedfryd 16 mis wedi ei gohirio am flwyddyn.

Cafodd Dragoonis hefyd ddedfryd 16 mis wedi ei gohirio.

Bydd yn rhaid i'r tri wneud 150 awr o waith di-dâl.

Dywedodd y Barnwr Huw Rees bod y digwyddiad yn un "gwarthus", ar ôl i'r tri gael "croeso" yn Aberystwyth.

"Nawr eich bod chi'n dadau, sut y byddai'n teimlo petai eich plant yn mynd allan i Aberystwyth a gweld rhywbeth fel hyn?", meddai.

Dywedodd y barnwr bod y dynion yn "llawn haeddu mynd i'r carchar", ond eu bod wedi "aeddfedu" ers y digwyddiad.

Bydd yn rhaid cwblhau'r gwaith di-dâl o fewn 12 mis.