Dyn yn cyfaddef llofruddio menyw 18 oed ym Mhenfro

Roedd dros ddwsin o berthnasau Lily Sullivan yn Llys y Goron Abertawe i weld y diffynnydd yn newid ei ble

Mae dyn 31 oed o Sir Benfro wedi newid ei ble a chyfaddef iddo lofruddio menyw 18 oed yng nghanol tref Penfro y llynedd.

Cafwyd hyd i gorff Lily Sullivan yn ardal Mill Pond y dref yn yr oriau mân ddydd Gwener 17 Rhagfyr.

Roedd Lewis Haines, o Landyfái, i fod i sefyll ei brawf ar 20 Mehefin ar ôl pledio'n euog i gyhuddiad llai difrifol o ddynladdiad.

Mewn gwrandawiad yn Llys Y Goron Abertawe ddydd Llun fe newidiodd ei ble i un o fod yn euog o lofruddiaeth.

Ymddangosodd trwy gysylltiad fideo gan gadarnhau ei enw a rhwbio'i ben yn ei ddwylo wrth gyfaddef iddo lofruddio Ms Sullivan.

Roedd dros ddwsin o berthnasau Ms Sullivan yn oriel gyhoeddus y llys.

Bydd Haines yn cael ei ddedfrydu ar 7 Gorffennaf.