Rhaglen ddogfen yn hwb arall i broffil Clwb Pêl-droed Wrecsam

Bydd y gyfres, sydd ar gael ar Disney+, yn dilyn Ryan Reynolds a Rob McElhenney yn bennaf

Bydd rhaglen ddogfen am Glwb Pêl-droed Wrecsam yn dechrau cael ei darlledu ledled y byd dros y diwrnod nesaf.

Bydd 'Welcome to Wrexham' yn dilyn sêr Hollywood Ryan Reynolds a Rob McElhenney yn y cyfnod ers iddyn nhw brynu'r clwb Cymreig yn 2021.

Y tymor diwethaf fe gollodd y clwb yn y gemau ail gyfle am y chweched tro, gan ohirio gobeithion hirddisgwyliedig o ddychwelyd i'r Gynghrair Bêl-droed yn Lloegr.

Ond mae'r gefnogaeth yn parhau i dyfu gartref a dramor, gyda'r actorion Reynolds a McElhenney yn helpu i ysgrifennu pennod newydd yn hanes y clwb.

Dechreuodd y gwneuthurwyr hyrwyddo'r gyfres ddogfen i gynulleidfa Americanaidd yr wythnos diwethaf, gyda thaith bws yn Los Angeles.

Bydd y gyfres ar gael ar Disney+ yn y Deyrnas Unedig o oriau mân fore Iau.

'Syrthio mewn cariad'

Mae gwerthiant tocynnau tymor bron deirgwaith yn uwch ers cyn i'r perchnogion newydd gymryd yr awenau.

Roedd y Cae Ras bron yn llawn yn nwy gêm gartref gyntaf Wrecsam y tymor hwn, gyda thorfeydd o 9,897 a 9,863, yn ôl swyddogion.

Dywedodd cyn-gyfarwyddwr y clwb, Spencer Harris, fod Wrecsam yn gymuned sydd wedi arfer brwydro'n erbyn yr elfennau ac un sy'n haeddu llwyddiant.

Fe wnaeth cefnogwyr ei arbed rhag mynd i'r wal yn 2011.

• Sut y daeth sêr Hollywood yn berchnogion Wrecsam

"Y peth rydyn ni'n ei garu yn fwy na dim ydy'r pêl-droed," meddai Mr Harris, a helpodd i selio'r cytundeb gyda Reynolds a McElhenney y llynedd.

Roedd ymhlith byddin o gefnogwyr a sefydlodd Ymddiriedolaeth Cefnogwyr Wrecsam ar ôl pleidleisio i achub y clwb rhag dymchwel mewn cyfarfod ar 24 Awst 2011.

Dywedodd Mr Harris mai'r "stori wych" oedd bod y perchnogion newydd wedi gweld "potensial" y clwb ac wedi "syrthio mewn cariad".

Y cynllun yw adeiladu eisteddle i 5,500 yn y Kop, gan ymestyn capasiti'r stadiwm i 15,000

Mae'r clwb yn bwriadu ailddatblygu rhan o stadiwm y Cae Ras gydag eisteddle i 5,500 o gefnogwyr yn y Kop, er mwyn cynyddu'r capasiti i fwy na 15,000.

Gobaith y cefnogwyr ydy y gallai'r datblygiad arwain at bêl-droed rhyngwladol yn dychwelyd i ogledd Cymru.

Mae gwerthiant tocynnau tymor i fyny 20%, sef 7,118 y tymor hwn, o gymharu â 5,892 ar gyfer 2021-2022 - a dyblodd hynny o 2,609 o docynnau tymor a werthwyd ar gyfer 2019/20.

Oddi cartref, mae'r clwb wedi gweld ei broffil cyfryngau cymdeithasol "yn ffrwydro" ers i enwau Reynolds a McElhenney gael eu cysylltu â'r clwb am y tro cyntaf ym mis Medi 2020.

Mae gan y clwb fwy na 130,000 o ddilynwyr ar ei gyfrif Instagram. Daeth mwy na 16% o'r gynulleidfa o'r Unol Daleithiau y tymor diwethaf, yn ôl data.

Y disgwyl i hynny gynyddu'n sylweddol yn sgil darlledu'r rhaglen ddogfen.