'Preifateiddio' Plas Menai ger Caernarfon yn 'siom'

Mae'r ganolfan yn cynnig amrywiaeth o gyrsiau hyfforddi a gweithgareddau awyr agored

Mae dau wleidydd o Wynedd wedi mynegi eu "siom" yn sgil cyhoeddiad y bydd canolfan awyr agored Plas Menai ger Caernarfon yn cael ei drosglwyddo i gwmni preifat.

Ym mis Mehefin, fe wadodd Chwaraeon Cymru - perchnogion y safle - y byddai Plas Menai, neu Canolfan Awyr Agored Genedlaethol Cymru, yn cael ei breifateiddio.

Ond, yn dilyn proses o chwilio am "bartner gweithredu" i gymryd rheolaeth o'r safle, mae wedi ei gadarnhau mai cwmni Parkwood Leisure fydd hwnnw.

Dywedodd llefarydd y byddai Parkwood yn rhedeg y ganolfan o ddydd i ddydd am gyfnod o 10 mlynedd o 30 Ionawr, 2023, yn dilyn "proses gaffael helaeth".

Mewn datganiad dywedodd Chwaraeon Cymru mai'r nod yw sicrhau "dyfodol cynaliadwy yn y tymor hir, gan ddarparu mwy o gyfleoedd i bobl fwynhau'r cyfleuster ac arfordir trawiadol gogledd Cymru".

• Gwadu preifateiddio Plas Menai ger Caernarfon

Ond yn ôl Aelod Seneddol Plaid Cymru dros Arfon, mae'r penderfyniad yn "siomedig" o ystyried y gwrthwynebiad sydd wedi bod "ers y cychwyn".

Ychwanegodd Hywel Williams AS mai "hwn oedd y penderfyniad anghywir gan fod y math hwn o fodel busnes bron bob amser yn arwain at lai o atebolrwydd, safonau gwasanaeth a hawliau gweithwyr anghyson".

"Mae cyhoeddiad heddiw [ddydd Mawrth] yn codi sawl pryder a fydd yn rhaid i Parkwood Leisure eu hateb yn llawn."

Fe alwodd am sicrwydd y bydd hawliau gweithwyr yn cael eu diogelu.

Effaith ar ddarpariaeth Gymraeg?

Ychwanegodd aelod Plaid Cymru dros Arfon yn Senedd Cymru, Sian Gwenllian, ei bod hithau hefyd yn "hynod siomedig" am y penderfyniad.

"Dwi'n gobeithio mai nad dechrau ar breifateiddio cyfleusterau hamdden gan Chwaraeon Cymru, sy'n cael ei ariannu gan Lywodraeth Cymru, yw hyn", meddai.

Wrth alw am ragor o wybodaeth am gynlluniau tymor hir Parkwood Leisure, fe gododd bryderon am yr effaith ar ddarpariaeth y Gymraeg hefyd.

Gofyn am sicrwydd i staff a chwestiynu effaith y preifateiddio ar ddarpariaeth y Gymraeg mae Sian Gwenllian

"Oes unrhyw ystyriaeth wedi bod am yr effaith y bydd y preifateiddio hyn yn cael ar y ddarpariaeth a hyrwyddo gwasanaethau iaith Gymraeg o fewn y ganolfan?

"A oes gan y cwmni rheoli bolisi iaith Gymraeg mewn lle - un sydd yn gadarn o ran amddiffyn a hyrwyddo'r iaith mewn amgylchedd gwaith?"

Ychwanegodd, "Mae'n debyg fod angen edrych o ddifri ynglŷn a dyfodol tymor hir Plas Menai a chael cynllun sy'n golygu fod y ganolfan yn cae ei defnyddio ar hyd y flwyddyn, ond does bosib fod ffordd arall o gwmpas hyn?

"Dwi ddim yn derbyn bod rhaid i gwmni preifat ddod i fewn i wneud y gwaith, mi fydda cynllun busnes ar gyfer model gwahanol yn gwbl bosib o dan yr amgylchiadau presennol."

'Arbenigedd ychwanegol'

Mewn datganiad dywedodd Chwaraeon Cymru y byddant yn parhau i fod yn berchen ar yr adeiladau a'r tir.

"Bydd grŵp partneriaeth strategol sy'n cynnwys cynrychiolwyr o Chwaraeon Cymru, Parkwood Leisure a staff sy'n gweithio ym Mhlas Menai yn monitro perfformiad y bartneriaeth.

"Yn ogystal â thyfu a gwella'r gwasanaethau presennol mae'n rhaid i'r bartneriaeth ddiogelu telerau ac amodau cyflogaeth staff."

Dywedodd Graham Williams, cyfarwyddwr yn Chwaraeon Cymru: "Mae Parkwood yn amlwg yn deall pa mor bwysig yw Plas Menai i Chwaraeon Cymru ac mae eu hanes o gydweithio i wella a darparu gwasanaethau yng Nghymru a thu hwnt yn nodedig.

"Mae Plas Menai eisoes yn ddarparwr gweithgareddau awyr agored byd-enwog gyda staff balch ac angerddol a does gen i ddim amheuaeth y bydd yr arbenigedd ychwanegol a ddaw gyda Parkwood Leisure yn arwain at fwy o bobl yn mwynhau popeth sydd gan Blas Menai i'w gynnig.

"Rydw i'n gyffrous i weld yr hyn y gallwn ni ei gyflawni gyda'n gilydd."

Dywedodd Brian Davies y bydd y safle yn "parhau fel cyfleuster Cymraeg, cenedlaethol pwysig iawn"

Ychwanegodd Brian Davies, prif weithredwr dros-dro Chwaraeon Cymru: "Da' ni'n deall fod pryderon am amodau gwaith staff ond hefyd yr iaith, ond be rydan ni wedi'i wneud gyda Parkwood yw sicrhau amodau gwaith y staff, sy'n eitha' unigryw mewn sefyllfa fel hyn.

"Ni'n blês iawn gyda hwnna ac mae'r iaith yn bwysig iawn i Chwaraeon Cymru. Fel corff cyhoeddus mae'n rhaid i ni wneud ein gorau glas dros yr iaith, a fydd hwnna yn y cytundeb gyda Parkwood.

"Bydd yn parhau fel cyfleuster Cymraeg, cenedlaethol pwysig iawn fydd yn ddwyieithog."