S4C yn 'adlewyrchu'r iaith sy'n cael ei siarad yng Nghymru'

Wrth i S4C ddathlu 40 mlynedd o ddarlledu yr wythnos hon, mae prif weithredwr y sianel yn dweud bod hi'n bwysig bod ei chynnwys "yn adlewyrchu sut mae pobl yn siarad Cymraeg heddi".

Roedd Siân Doyle yn ymateb i gwestiwn ynghylch y defnydd o'r Saesneg mewn rhaglenni Cymraeg wrth gael ei holi ar raglen Dros Frecwast.

Mae denu siaradwyr newydd, meddai, "yn rywbeth sy'n reit ar flaen ein blaenoriaethau ni" hefyd dros y 10 mlynedd nesaf, ynghyd â sicrhau bod modd gweld cynnwys S4C ar yr holl blatfformau digidol perthnasol.

Dywedodd hefyd bod y sianel yn trafod "bob dydd" sut mae parhau i sicrhau cynnwys safonol ac uchelgeisiol yn ystod yr argyfwng ariannol presennol.

• Chwyddiant am gael 'effaith andwyol' ar waith S4C

• S4C: Y fraint wedi'r 'frwydr' i lansio'r sianel

Pan ofynnwyd faint o Saesneg roedd hi'n fodlon gweld ar y sianel, dywedodd Siân Doyle mai'r prif ystyriaeth yn hytrach yw "adlewyrchu sut mae pobl yn siarad Cymraeg heddiw a dyna yw ein prif flaenoriaeth".

"Y'n ni wedyn yn rhoi mwy o is-deitle ar, fel bod pobl sy'n dechre siarad Cymraeg yn gallu dilyn pethe.

"Y'n ni'n dechre sôn ynglŷn â sut y'n ni'n cael mwy o ddysgwyr i mewn a siaradwyr newydd yr iaith i'r sianel. Mae hwnne yn rywbeth sy'n reit ar flaen ein blaenoriaethe ni wrth i ni edrych ar y ddegawd nesa'."

Mae S4C yn nodi carreg filltir yr wythnos hon wrth ddathlu 40 mlynedd o ddarlledu

O ran cyfraniad y sianel at hybu'r Gymraeg, dywedodd: "Mae'n bwysig bod gyda ni bethe cyfoes i bobl Cymru fel bod nhw'n gallu gweld yr iaith yn ffynnu ar y teledu neu ar TikTok neu le bynnag mae e.

"Dwi'n credu bod ni'n rhan hanfodol o hynny... ni'n gweithio gyda phartneriaid, gyda'r llywodraeth o ran cyrraedd y miliwn [targed nifer y siaradwyr Cymraeg erbyn 2050].

"Mae hwnne'n rywbeth y'n ni'n edrych arno trwy'r amser."

Cynnwys mwy 'uchelgeisiol'

Mae'r sianel yn "hynod o falch", medd Siân Doyle, bod setliad ariannol diwethaf Llywodraeth y DU wedi rhoi sicrwydd ariannol tan Ebrill 2028.

Yn sgil y setliad yna, mae'r sianel eisoes wedi dechrau gwaith i adnewyddu'r gwasanaeth rhaglenni-ar-alw Clic dros y misoedd nesaf a'i roi ar bob platfform digidol.

Serch hynny, mae'r argyfwng ariannol bresennol yn fater "sy' ar ein meddylie ni yn bendant ar hyn o bryd" ac mae'r her o ddarparu cynnwys dan y fath amgylchiadau "yn rhywbeth y'n ni'n trafod bob dydd nawr".

Y peth pwysicaf, meddai, yw "targedu ein cynulleidfa yn dda" a sicrhau "cynnwys safonol" ac mae hi'n gobeithio y bydd gwylwyr yn "gweld gwahaniaeth achos y'n ni'n dod â cynnwys mwy uchelgeisiol i'r sianel".

Cyfeiriodd at y rhaglen Gogglebocs Cymru sy'n dechrau nos Fercher, a'r rhaglenni Cwpan y Byd dros yr wythnosau nesaf.

Tudur Owen yw cyflwynydd y fersiwn Cymraeg o'r rhaglen deledu boblogaidd Gogglebox

Mae'r sianel hefyd yn ymateb i'r newid ym mhatrymau gwylio cyffredinol trwy adael ei wylwyr ddewis sut maen nhw'n gwylio rhaglenni.

Mae'r gyfres ddrama Dal y Mellt yn cael ei darlledu fesul pennod bob nos Sul ar hyn o bryd ond mae hefyd ar gael yn ei chyfanrwydd ar-lein "fel box set i bobl sy'n dymuno gwylio'r cyfan mewn cyfnod byrrach".

"Mae'r [gwylio] llinol yn dal yn hynod o bwysig," meddai. "Mae'n cynulleidfa ni yn dal yn mynd i fod yn gwylio yn llinol, yn enwedig pethe byw - newyddion, chwaraeon, Cwpan y Byd...

"Ond wedyn fydden ni hefyd yn 'neud yn siŵr bod ni'n rhoi rhai pethe yn ddigidol hefyd fel pobl yn gallu dewis le maen nhw mo'yn gwylio a pryd maen nhw mo'yn gwylio."

Mae'r gyfres ddrama Dal y Mellt ar gael yn ei chyfanrwydd ar-lein ar gyfer gwylwyr nad sy'n dymuno ei gwylio fesul pennod bob wythnos

Er nad yn rhagweld diwedd ar amserlenni teledu traddodiadol am gyfnod hir eto, y cwestiwn, medd, Siân Doyle yw faint o blatfformau fydd yn dod i'r amlwg yn y cyfamser.

"Mae'n bwysig fod ni fel S4C yn dala lan gyda'r rheina ac yn neud yn siŵr bod ni ar y llefydd iawn wrth i bobol wylio yn wahanol," dywedodd.

"Y'n ni'n gwybod bod pobl ifanc yn gwylio newyddion ar, er enghraifft, Instagram a TikTok. Ni nawr yn dod â newyddion ar Instagram a TikTok...

"Mae'n bwysig ein bod ni ddim dim ond yn rhoi arlwy i'r gynulleidfa draddodiadol... ond hefyd i'r gynulleidfa ifanc sy'n dod trwy'r ysgolion ac yn helpu ffynnu'r iaith Gymraeg."