Gwrthwynebu rhyddfraint Wrecsam i Rob a Ryan dros ffrae Mullin

Mae Ryan Reynolds a Rob McElhenney wedi codi proffil y clwb pêl-droed a'r dref

Mae cynghorydd Ceidwadol o Gyngor Wrecsam wedi gwrthwynebu cynnig i roi anrhydedd rhyddfraint y ddinas i berchnogion CPD Wrecsam, Ryan Reynolds a Rob McElhenney.

Pleidleisiodd y Cynghorydd Hugh Jones yn erbyn anrhydeddu'r actorion am eu cyfraniad i'r ddinas wedi i ymosodwr y clwb, Paul Mullin, wisgo esgidiau gyda neges arnyn nhw'n sarhau'r Blaid Geidwadol.

Roedd y geiriau ar yr esgidiau, meddai'r Cynghorydd Jones, yn "neges o gasineb" ac fe feirniadodd Ryan Reynolds am hoffi llun ohonyn nhw a gyhoeddodd Mullin ar y cyfryngau cymdeithasol.

Bydd cynnig y rhyddfraint nawr yn mynd o flaen holl gynghorwyr y sir pan fydd y cyngor llawn yn cyfarfod ar 21 Rhagfyr.

• Enwebiad Rhyddfraint Wrecsam yn 'fraint' i Rob a Ryan

• Wrecsam yn gwahardd esgidiau'n sarhau'r Ceidwadwyr

Hugh Jones a chynghorydd Ceidwadol arall, Paul Roberts, oedd yr unig aelodau o fwrdd gweithredol Cyngor Wrecsam i wrthwynebu rhoi'r gair olaf i'r cyngor llawn.

"Dwi wedi ystyried yr argymhelliad yma o ddifri' dros yr wythnosau diwetha'," meddai'r Cynghorydd Jones - arweinydd grŵp Ceidwadol y cyngor a'r aelod sy'n arwain ar faterion amgylcheddol ac yn hyrwyddo'r Gymraeg.

Dydy'r 'amseriad ddim yn iawn', ym marn Hugh Jones, mor fuan wedi'r ffrae dros esgidiau Paul Mullin

"Dwi'n llawn ddeall yr angerdd dros Glwb PêI-droed Wrecsam, ond i mi dydy'r amseriad a'r gwerthoedd a'r blaenoriaethau ddim yn iawn.

"'Dan ni'n rhoi rhyddfraint ar adeg pan mae un o'u chwaraewyr amlycaf wedi cyhoeddi neges o gasineb i ran o'n cymuned, ac mae un o'r perchnogion wedi hoffi neges Instagram yn cynnwys y neges honno o gasineb."

"Mae'n iawn i bobl anghytuno [ond] mae casineb yn ddinistriol o le bynnag y daw. Pan ddaw o bobl amlwg, dydw i ddim yn credu bod hynny'n ateb gofynion rhyddfraint y bwrdeistref sirol."

Mae'r sefyllfa, meddai, yn codi cwestiynau ynghylch "pwy rydym am eu cydnabod yn ein cymdeithas" a pha neges y byddai'n ei roi i ysgolion a phobl ifanc.

Awgrymodd hefyd gyrff a phrojectau lleol eraill sy'n haeddu'r anrhydedd cymaint, os nad mwy, gan gynnwys Côr Meibion Rhosllannerchrugog, sylfaenwyr cwmni Moneypenny, cynhyrchwyr y brechlyn Covid-19 a chanolfan chwarae The Venture ym Mharc Caia.

Mae'r clwb wedi gwahardd Paul Mullin rhag gwisgo'r esgidiau, gan ddweud eu bod yn 'niwtral yn wleidyddol'

Dywedodd CPD Wrecsam bod y llun o esgidiau Paul Mullin wedi'i gymryd "heb i ni wybod na rhoi caniatâd".

Ychwanegodd eu bod yn cymryd "safbwynt niwtral" ar wleidyddiaeth, a'u bod yn "delio gyda'r mater yn breifat".

Mae'r cyngor yn cynnig rhoi rhyddfraint y ddinas i'r sêr Hollywood yn sgil effaith eu penderfyniad i brynu'r clwb pêl-droed a'r sylw i'w clwb a'r ardal ers hynny o bedwar ban byd.

Mae'r enwebiad hefyd yn cydnabod hanes hir y clwb ei hun.

Yng nghyfarfod y bwrdd gweithredol, dywedodd Hugh Jones bod y clwb wedi rhoi Wrecsam ar map "ers degawdau" ac yn haeddu cydnabyddiaeth "ers cyfnod maith", diolch i wirfoddolwyr a achubodd y clwb cyn i'r actorion ei brynu.

Ond roedd arweinwyr y gwrthbleidiau - Dana Davies ar ran Llafur a Marc Jones o Blaid Cymru - yn feirniadol bod y cynnig rhyddfraint wedi mynd o flaen y bwrdd gweithredol yn hytrach nag yn syth i'r cyngor llawn.