Cyfarfod clybiau i drafod newidiadau bwrdd rheoli URC

Mae cadeirydd URC, Ieuan Evans, wedi bod yn cynnal cyfres o gyfarfodydd ledled Cymru i esbonio'r newidiadau

Bydd cynrychiolwyr cannoedd o glybiau rygbi yn cwrdd ddydd Sul ar gyfer cyfarfod arbennig i ystyried cynnig i foderneiddio Undeb Rygbi Cymru (URC).

Bydd y cyfarfod cyffredinol eithriadol ym Mhort Talbot yn trafod newidiadau sylweddol i fwrdd rheoli URC, yn dilyn ymchwiliad gan BBC Cymru wnaeth ddatgelu honiadau o ddiwylliant gwenwynig a chasineb tuag at ferched o fewn yr undeb.

Bydd cynrychiolwyr 282 o glybiau o bob cwr o Gymru yn cael pleidleisio ar y cynnig, ac mae angen i 75% ei gefnogi er mwyn i'r newidiadau ddod i rym.

Os yw'r newidiadau yn cael sêl bendith y clybiau, fe fydd o leiaf pump allan o 12 aelod y bwrdd rheoli yn fenywod, gan gynnwys naill ai'r cadeirydd neu'r prif weithredwr.

Fe fydd nifer yr aelodau annibynnol yn dyblu o dri i chwech - yn ogystal â chadeirydd annibynnol - a nifer yr aelodau sy'n cael eu hethol gan y clybiau yn gostwng o wyth i bedwar.

'Angen newid a moderneiddio'

Y nod, yn ôl arweinwyr yr undeb, yw sicrhau amrywiaeth ehangach o ran sgiliau busnes, meddylfryd, rhywedd a chynrychiolaeth ddiwylliannol ar y bwrdd rheoli.

Mae cadeirydd URC, Ieuan Evans, a'r prif weithredwr dros dro, Nigel Walker, wedi bod yn cynnal cyfres o gyfarfodydd ledled Cymru i esbonio'r newidiadau.

Ddydd Gwener, dywedodd Mr Walker ei fod yn "hyderus ond ddim yn hunanfodlon" y byddai digon o glybiau yn cefnogi'r cynnig.

Cafodd cynnig i benodi cadeirydd annibynnol i'r bwrdd ei wrthod ym mis Hydref 2022 oherwydd doedd y nifer o blaid ddim wedi croesi'r trothwy o 75%.

Dywedodd Nigel Walker fod gwahaniaethau barn, ond bod angen moderneiddio URC

Ond mae'r prif weithredwr dros dro yn credu bod agweddau wedi newid bellach.

"Mae'r ymateb gan glybiau ar hyd a lled y wlad wedi bod yn wahanol y tro hwn," meddai Mr Walker.

"Ry'n ni wedi esbonio pam bod angen y newidiadau hyn, ac roedd pobl yn awyddus i'n herio ni, sy'n gwbl gywir

"Mae 'na wahaniaethau barn ynglŷn â sut y dylwn ni newid, ond mae pobl sy'n poeni am rygbi Cymru - y clybiau, y rhanbarthau, y chwaraewyr, swyddogion a staff - yn derbyn bod angen newid a moderneiddio."