Holl garfan CPD Derwyddon Cefn yn gadael y clwb

Mae Derwyddon Cefn wedi chwarae ar faes Y Graig ers symud o Plaskynaston yn 2010

Mae hyfforddwyr a chwaraewyr Clwb Pêl-droed Derwyddon Cefn wedi cyhoeddi eu bod i gyd yn gadael y clwb yn sgil honiadau bod cyflogau yn ddyledus iddynt.

Er bod y clwb wedi gorffen yn seithfed yn y Cymru North eleni, maen nhw dan embargo trosglwyddiadau ac roedden nhw ond wedi gallu dewis tîm o naw chwaraewr ar gyfer eu gêm olaf o'r tymor.

Wrth ymateb i ddatganiad gan y chwaraewyr a'r hyfforddwyr dywedodd cadeirydd y clwb, Des Williams, ei fod wedi ei "dristáu".

"Rwy'n bersonol yn drist eu bod wedi cymryd y camau hyn ac wedi gwneud sylwadau sy'n anghywir ac yn ymgais bwriadol i daflu cysgod dros y clwb a minnau," meddai Williams.

"Dwi wedi bod yn ffyddlon i'r chwaraewyr a'r rheolwyr ac wedi caniatáu iddyn nhw fwrw ymlaen â'r swydd dan sylw.

Mae gwreiddiau'r clwb yn deillio yn ôl i 1872 pan gawson nhw eu sefydlu gan Llewelyn Kenrick - y dyn aeth ymlaen i sefydlu Cymdeithas Bêl-droed Cymru

"Rwy'n ffeindio fy hun yn darged hawdd i'r rhai sy'n anhapus ac yn dymuno lleisio'u barn yn gyhoeddus, waeth beth fo'r gwir neu'r canlyniadau."

Ychwanegodd y byddai'r datganiad a'r materion a godwyd yn cael sylw "dros y dyddiau nesaf".

Embargo trosglwyddiadau

Ymhlith un o glybiau mwyaf hanesyddol ac arwyddocaol Cymru, chwaraeodd y Derwyddon yng ngemau rhagbrofol Cynghrair Europa mor ddiweddar â 2018.

Ond collodd y clwb o ardal Wrecsam eu lle ym mhrif haen pêl-droed Cymru ar ddiwedd tymor 2021-22, ar ôl gorffen ar y gwaelod gydag ond dwy fuddugoliaeth.

Fis Ionawr cafodd y Derwyddon eu gwahardd rhag arwyddo chwaraewyr am ddwy ffenestr drosglwyddo ar ôl cael eu cyhuddo o dorri canllawiau trosglwyddo Fifa y tymor blaenorol.

Roedd y rheolwr, Neil Ashton, ond wedi gallu enwi naw chwaraewr ar gyfer eu gêm gynghrair olaf o'r tymor ym mis Ebrill wrth iddyn nhw golli o 8-0 yn erbyn Prestatyn.

Mae'r clwb wedi derbyn trwydded ail haen ar gyfer y tymor nesaf, ond mae ansicrwydd dros hynny bellach wedi i'r garfan adael.

"Mae yna lawer o bobl dda o fewn y clwb, ond nid dyma'r clwb rydyn ni i gyd wedi arwyddo ar ei gyfer ac eisiau bod yn rhan ohono," meddai datganiad ar ran y chwaraewyr.

Fe gyrhaeddod y clwb Gynghrair Europa yn 2018

"Dechreuodd y tymor gyda chwaraewyr newydd a gobeithion uchel o sicrhau dyrchafiad, fe wnaethon ni recriwtio'n dda ac roedden ni'n teimlo y gallen ni herio tua'r brig.

"Yn anffodus doedd pethau tu ôl i'r llenni ddim yn adlewyrchu'r hyn roedd y chwaraewyr yn ei wneud ar y cae.

"Roedd diffyg cit hyfforddi yn golygu ein bod ni'n edrych yn debycach i dîm cynghrair Sul na Chymru North.

"Mae'r tymor bellach ar ben a gyda'n gilydd byddwn ni gyd yn gadael Derwyddon Cefn.

"Mae'n sefyllfa drist ond ni allwn ni, fel grŵp, oddef y driniaeth rydyn ni wedi'i chael ac yna mynd yn ôl eto am fwy y tymor nesaf.

"Yn anffodus mae'r clwb wedi gohirio taliadau hyd yma, gyda llawer ohonon ni'n dal i aros am dros bythefnos o gyflog a hynny bron i dair wythnos ers i'r tymor ddod i ben."