Geraint Thomas yn arwain y Giro d'Italia oherwydd Covid

Geraint Thomas ddaeth yn ail yn y ras yn erbyn y cloc ddydd Sul

Y Cymro Geraint Thomas sydd ar y blaen yn y Giro d'Italia bellach, wedi i'r unig seiclwr oedd o'i flaen gael prawf positif am Covid-19.

Roedd Remco Evenpoel wedi adennill Crys Pinc arweinydd y ras ar ôl ennill y nawfed cymal - ras yn erbyn y cloc - ddydd Sul.

Thomas ddaeth yn ail yn y cymal hwnnw, o un eiliad yn unig, gan olygu ei fod wedi codi o'r pumed safle i ail yn y dosbarthiad cyffredinol.

Ond yna'n hwyr nos Sul daeth cadarnhad fod Evenpoel - oedd 45 eiliad ar y blaen i Thomas - wedi cael prawf positif, ac felly bydd yn rhaid iddo dynnu 'nôl o'r ras.

Dyw Thomas, 36 - y Cymro cyntaf i ennill y Tour de France yn 2018 - erioed wedi ennill y Giro.

Ond ef fydd yn gwisgo'r Crys Pinc ar gyfer y 10fed cymal ddydd Mawrth, wedi diwrnod o seibiant ddydd Llun.

Dim ond dwy eiliad o fantais sydd ganddo dros Primoz Roglic o Slofenia yn yr ail safle, tra bod cyd-seiclwr Thomas gydag Ineos Grenadiers, Tao Geoghegan Hart o Loegr, yn drydydd.

Mae 21 cymal i gyd, gyda'r ras yn gorffen yn Rhufain ddydd Sul, 28 Mai.

Dosbarthiad cyffredinol

1. Geraint Thomas (Ineos Grenadiers) 34awr 34munud 27eiliad

2. Primoz Roglic (Jumbo-Visma) +2eiliad

3. Tao Geoghegan Hart (Ineos Grenadiers) +5

4. Joao Almeida (UAE Team Emirates) +22

5. Andreas Leknessund (Team DSM) +22