Apelio am wybodaeth ar ôl nifer o danau gwyllt

Y tân ar fynydd yn Y Porth yn Rhondda Cynon Taf rai dyddiau'n ôl

Mae Gwasanaeth Tân ac Achub De Cymru yn apelio am wybodaeth ynglŷn â nifer o danau gwyllt dros y penwythnos.

Fe wnaeth criwiau ymateb i 24 tân glaswellt a chredir fod 18 ohonyn nhw yn danau a gafodd eu cynnau yn fwriadol.

Roedd rhai o'r mannau hynny'n cynnwys Abertawe, Y Porth, Glyn-nedd a Machynlleth. 

Mae diffoddwyr yn poeni y bydd mwy o achosion wrth i'r tywydd boethi dros yr wythnosau a misoedd nesaf. 

Yn 2022, fe wnaeth y gwasanaethau tân ledled Cymru ymateb i 3,269 o danau glaswellt.

Roedd hyn yn gynnydd o 62% ar y flwyddyn flaenorol, gyda nifer y tanau glaswellt bwriadol yn cynyddu o 1,542 (47%) i 2,263.

Rhybudd am farbeciws tafladwy

Mae Aled Griffiths yn rheolwr gorsaf gyda Gwasanaeth Achub Canolbarth a Gorllewin Cymru.

Dywed bod y broblem yn cynyddu wrth i fwy o dwristiaid ymweld â Chymru. 

'Rhaid glynu at y canllawiau,' medd Aled Griffiths

"Roedd hi'n broblem fawr flwyddyn ddiwethaf, yn enwedig yn yr haf poeth gafon ni.

"Gethon ni 500% yn fwy o alwadau tân ym mis Awst yn unig, i gymharu â'r flwyddyn cyn hynny."

Yn ôl Mr Griffiths un o'r achosion mwyaf oedd barbeciws tafladwy.

"Ni'n erfyn ar bobl os maen nhw'n defnyddio nhw, ddim i adael nhw a defnyddio nhw mewn ffordd lle dydyn nhw ddim yn creu dinistr a niwed i fywyd gwyllt.

Y fflamau yn rhuo ar lethrau Mynydd Mawr ger Y Fron yn 2022

Ychwanegodd: "Yn anffodus os mae pobl yn cynnau tân - mae yna lot o danwydd ar y bryniau ar y foment. Felly'n amlwg os mae pobl yn mynd i gynnau tanau, mae'n mynd i fod yn broblem.

"Ni'n rhybuddio pobl os mae yna danau mawr pa fath o action i gymryd. Cau ffenestri ac yn y blaen achos mae'r mwg sy'n dod o'r tanau yma'n achosi trwbl i'n cymunedau ni.

"Ni'n erfyn ar bobl os maen nhw'n gweld pobl yn dechrau tân yn fwriadol i reportio nhw i'r heddlu ar rif Crimestoppers."

Yn ogystal â thwristiaeth, mae tirfeddianwyr yn llosgi ar dir preifat yn gallu achosi problemau i'r gwasanaeth tân ac achub.

Yn 2022, fe wnaeth y gwasanaethau tân ledled Cymru ymateb i 3,269 o danau glaswellt - roedd hyn yn gynnydd o 62% ar y flwyddyn flaenorol

Yn ôl Aled Griffiths mae angen i dirfeddianwyr sicrhau eu bod yn glynu at y canllawiau diogelwch cywir. 

"Yn gyntaf oll i 'neud hynny tu fewn i'r ffenest swyddogol," ychwanegodd. 

Does dim caniatâd i losgi ar dir preifat, heblaw rhwng 1 Hydref a 31 Mawrth ar ucheldir neu rhwng 1 Tachwedd a 15 Mawrth ymhobman arall. Mae Mr Griffiths yn pwysleisio bod yna ganllawiau i'w dilyn wrth wneud hynny.

"Mae'n rhaid gadael y gwasanaeth tân i wybod eu bod nhw'n llosgi a hefyd llosgi mewn ffordd lle dyw'r tân ffili mynd mas o control."