Cwest: Merch 5 oed wedi marw ar ôl tân yn ei chartref

Roedd Alysia wedi'i gweld ddiwethaf yn ystafell wely ei chwaer

Mae cwest i farwolaeth merch bump oed fu farw ar ôl tan mewn tŷ yn Sir Benfro wedi cael ei agor a'i ohirio.

Bu farw Alysia Salisbury yn y cartref teuluol, Dolgoed, ym mhentref Pontyglasier ger Crymych fis diwethaf.

Yn ystod gwrandawiad byr yn Neuadd y Dref Llanelli fore Gwener, clywodd y Crwner Paul Bennett adroddiad gan Swyddog y Crwner, PC James Lang.

Dywedodd PC Lang bod yr heddlu wedi cael eu hysbysu gan y gwasanaeth tân am 21:57 ar 27 Mai am dân mewn tŷ ym Mhontyglasier, ac nad oedd modd canfod Alysia.

Cyn y tân, fe welwyd hi am y tro olaf yn 'stafell wely ei chwaer, ar y llawr cyntaf, tua cefn y tŷ.

Bu farw Alysia wedi'r tân yng nghartref ei theulu ym mhentref Pontyglasier

Cafodd ei chorff ei ddarganfod am 01:05 ar 28 Mai yn y 'stafell wely honno.

Cadarnhaodd meddyg gyda'r ambiwlans awyr ei bod hi wedi marw.

Mae archwiliad post mortem wedi ei gynnal ar y corff ac mae disgwyl adroddiad.

Mae ymchwiliad yr heddlu yn parhau, ac fe ohiriwyd y cwest tan fis Hydref.

Dywedodd y Crwner dros dro ar gyfer Sir Gâr a Sir Benfro, Paul Bennett, ei fod yn estyn ei gydymdeimlad diffuant i'r teulu.