Cystadlaethau UEFA: Trip i Sweden i'r Seintiau Newydd

Y Seintiau Newydd yw pencampwyr y Cymru Premier, ond maen nhw'n wynebu talcen caled wrth herio BK Hacken o Sweden

Taith i Sweden fydd yn wynebu'r Seintiau Newydd wrth iddynt herio BK Hacken yn rowndiau rhagbrofol Cynghrair y Pencampwyr.

Er yn un o'r detholion, bydd y clwb o Groesoswallt yn chwarae un o'r timau cryfaf y gallant wedi'u hwynebu wrth geisio cyrraedd yr ail rownd ragbrofol.

Eisoes wedi cychwyn eu tymor, doedd Hacken ddim wedi'u dethol gan iddynt ennill pencampwriaeth Sweden am y tro cyntaf yn 2022.

Bydd y cymal cyntaf yn Gothenburg ar 11/12 Gorffennaf, gyda'r ail gymal yng Nghroesoswallt ar 18/19 Gorffennaf.

Cyngres Ewropa

Ond llwyddodd gweddill clybiau'r Cymru Premier i dynnu gemau ychydig yn fwy caredig o'r het.

Bydd Penybont, sy'n yn gwneud eu hymddangosiad cyntaf yn Ewrop, yn wynebu Santa Coloma o Andorra yn rownd ragbrofol gyntaf Cyngres Ewropa.

Cae'r Bragdy ym Mhen-y-bont ar Ogwr fydd yn llwyfannu gêm gartref Penybont

Bydd tîm Rhys Griffiths yn chwarae gartref yn y cymal cyntaf ar 13 Gorffennaf, i'w chwarae ar Gae'r Bragdy ym Mhen-y-bont ar Ogwr.

Taith i KF Shkëndija o Ogledd Macedonia fydd gwobr Hwlffordd, wedi iddynt gyrraedd Ewrop am y tro cyntaf ers 2004.

Bydd tîm Tony Pennock, a drechodd y Drenewydd yn rownd derfynol y gemau ail gyfle, yn chwarae eu hail gymal yn Stadiwm Dinas Caerdydd ar 20 Gorffennaf.

Yn un o'r detholion yn y gystadleuaeth, bydd Cei Connah yn wynebu KA Akurei o Wlad yr Iâ, gyda thîm Neil Gibson oddi cartref ar gyfer y cymal cyntaf.