Ffos-y-Fran: Glofa ddadleuol i gau ddiwedd Tachwedd

Daeth y caniatâd cynllunio ar safle Ffos-y-Fran i ben ym Medi 2022

Bydd glofa Ffos-y-Fran ym Merthyr Tudful yn cau ddiwedd fis Tachwedd, gyda'r holl weithwyr yno yn colli eu swyddi, yn ôl perchnogion y safle.

Fe ddaeth caniatâd cynllunio ar gyfer safle glo brig mwya'r DU i ben fis Medi'r llynedd, ond hyd yma mae'r gwaith wedi parhau yno.

Mae cwmni Merthyr (South Wales) Ltd bellach yn dweud eu bod wedi cyflwyno hysbysiad i Lywodraeth Cymru o'u bwriad i gau ar 30 Tachwedd, unwaith bydd y gwaith o sicrhau diogelwch y safle wedi cael ei gwblhau.

Bydd tua 180 o weithwyr yn colli eu swyddi, gyda'r cwmni wedi dechrau ar broses ymgynghori gydag undeb Unite.

• Ffos-y-Fran: Ymgyrchwyr yn cymryd camau cyfreithiol

• Dal i gloddio glo Ffos-y-Fran yn 'gynsail ofnadwy'

• Ffos-y-fran: Cyhuddo cwmni o gloddio am lo 'tu hwnt i'r ffiniau'

Mae yna ddadlau cyson wedi bod ynglŷn â dyfodol y safle, a phrotestiadau gan ymgyrchwyr amgylcheddol.

Ar ôl cyfnod o 15 mlynedd roedd cloddio am lo i fod i ddod i ben yn Ffos-y-Fran ym mis Medi 2022.

Ond fe barhaodd y gwaith yno, gyda chais y cwmni am ragor o amser yn cael ei wrthod ym mis Ebrill 2023.

Ddiwedd fis Mehefin fe dderbyniodd y perchnogion orchymyn terfynol gan Gyngor Merthyr i roi'r gorau i'r gwaith o fewn 28 diwrnod, cyn i'r cwmni gyflwyno apêl newydd.

Roedd ymgyrchwyr newid hinsawdd wedi cyflwyno cais am adolygiad barnwrol i'r Uchel Lys wrth i'r dadlau am y safle barhau.