Cyhuddo dyn o lofruddio wedi marwolaeth yn Llanelli

Dywedodd teulu Ashley Sasero y bydd colled enfawr ar ei ôl

Mae dyn wedi cael ei gyhuddo o lofruddiaeth yn dilyn marwolaeth dyn 26 oed yn Sir Gâr y penwythnos diwethaf.

Bu farw Ashley Sarsero yn gynnar fore Sul yn ardal Maestir yn Llanelli.

Dywedodd Heddlu Dyfed-Powys fod James Alan Smith, 35 oed o Lanelli, wedi cael ei gyhuddo o lofruddiaeth.

Mae dyn arall o'r dref - Stephen George Morgan, 36 oed - wedi'i gyhuddo o roi cymorth i droseddwr.

Mae disgwyl i'r ddau ymddangos yn Llys Ynadon Llanelli ddydd Iau.

Mae dyn arall 38 oed a gafodd ei arestio fel rhan o'r ymchwiliad wedi cael ei ryddhau ar fechnïaeth yr heddlu.

Cafodd yr heddlu eu galw i ardal Maestir yn Llanelli yn gynnar fore Sul

Mewn datganiad, dywedodd teulu Mr Sarsero y bydd colled enfawr ar ei ôl.

"Byddai ein bachgen annwyl yn goleuo pob ystafell.

"Roedd yn frawd cariadus i Emily, Rosie, Zach a Liam, yn bartner i Jade ac yn fab ffyddlon i Claire a Wayne."

Mae'r heddlu'n parhau i ofyn i unrhyw un sydd â gwybodaeth i gysylltu â nhw.