Tŷ Hafan: Cais parc gwyliau drws nesaf yn bryder i rieni

Mae rhieni plant fu farw yn hosbis Tŷ Hafan wedi dweud y byddai adeiladu parc gwyliau wrth ei ymyl yn difetha llonyddwch a diogelwch y safle.

Mae perchennog Barry Island Pleasure Park wedi cyflwyno cais i gyngor Bro Morgannwg er mwyn adeiladu parc gwyliau newydd ar dir ger Tŷ Hafan.

Mae'r hosbis, sy'n cynnig gofal diwedd oes i blant, wedi rhyddhau datganiad yn gwrthwynebu'r cais.

Fe ddywedodd Henry Danter, sydd am agor y parc gwyliau, mai dyma fyddai'r "cymydog gorau posib i Dŷ Hafan".

• Pryder am safle gwyliau drws nesaf i hosbis Tŷ Hafan

• Hosbisau Cymru i dderbyn £2.2m ychwanegol

'Llonyddwch a heddwch'

Un sy'n gwrthwynebu'r cynllun am barc gwyliau yw Natalie Ridler, mam Morgan Ridler a fu farw yn Tŷ Hafan o fath prin o ganser.

Yn siarad ar raglen Dros Frecwast, Radio Cymru, dywedodd Ms Ridler: "Pryd gwnaeth Morgan farw, roedd e mor bwysig i ni sut roedd Morgan wedi marw.

"Doedd dim lot o ddewisiadau gyda ni... y rheswm nath fi a fy ngŵr ddewis hosbis oedd fod digon o gyfleusterau fan 'na i roi cymorth i fi a Matthew a hefyd ein merch fach dwy flwydd oed.

Bu farw Morgan yn dair blwydd oed o fath prin o ganser yn ei stumog

"Ni'n gwbod bydd Morgan yn gallu cael heddwch a llonyddwch fan 'na, a bydd urddas gyda fe, felly mewn ffordd roedden ni'n dewis neud yn siŵr bod Morgan yn cael good death. Os oes rhaid i ti ddewis rhywle i blant ti marw, mae Tŷ Hafan yn berffaith.

"Os ti'n cerdded trwy ardd Tŷ Hafan does dim sŵn i glywed ond am y môr a'r aderyn yn y coed ac mae just mor berffaith.

"Just y foment ar ôl i Morgan farw, just siawns i chi cael llonydd, a dwi ddim gallu dychmygu eistedd fan 'na yn gwylio plentyn ti'n marw a chlywed noise a pheiriannau a phethau'n mynd ymlaen drws nesa'.

Mae teulu Morgan Ridler wedi sefydlu elusen yn enw eu mab

"Os chi'n gallu dychmygu eistedd a dal llaw dy blant yn marw a gallu clywed parc gwyliau drws nesaf da teuluoedd yn joio a'n rhedeg o gwmpas...

"Ni ddim angen unrhyw beth fel yna'n mynd ymlaen drws nesa pan wyt ti'n mynd trwy bethau mor drawmatig.

"Ni angen gadael y llonyddwch a'r heddwch yna i rieni bydd rhaid defnyddio y cyfleusterau yn y dyfodol," ychwanegodd.

"Mae yna dros 500 o barciau gwyliau yng Nghymru ond dim ond un Tŷ Hafan."

Fe wnaeth Cai dderbyn gofal yn Nhŷ Hafan am 11 o flynyddoedd

Fe wnaeth mab Micaela Turner, Cai, dderbyn diagnosis o gyflwr prin iawn pan yn fabi.

Er nad oedd disgwyl iddo fyw heibio'i ddwy oed, bu farw ychydig cyn ei benblwydd yn 12 y llynedd yn Nhŷ Hafan, Sili.

"Petai maes carafanau neu barc gwyliau drws nesaf pan oedd Cai yn fyw," medd Micaela, "dwi'n meddwl y byddai hynny wedi newid fy mhenderfyniad o ran lle ro'n i am i Cai farw."

"Bydden i wedi ei gweld hi'n anodd gwybod fod pobl drws nesaf yn mwynhau, yn bod yn swnllyd, a ddim yn deall fod 'na hosbis i blant drws nesaf, a byddai Cai ddim wedi cael y profiad gafodd e.

"Roedd sawl adeg pan o'dd angen pum munud arna i er mwyn prosesu beth oedd yn digwydd.

"O'n i'n gwybod nad oedd fy mhlentyn i am ddod adref. O'n i'n gwybod fy mod i am wylio fy mab yn marw dros y dyddiau nesaf.

"Bydden i'n aml yn dod i eistedd wrth ymyl y môr er mwyn lleddfu rhai o'r ofnau a'r pryderon."

Byddai'r cynlluniau yn atal plant eraill rhag gael yr un profiad yn yr hosbis a gafodd Cai, medd ei fam

Fe gafodd Cai ofal yn Nhŷ Hafan am dros 11 mlynedd.

"Byddai'r swn yn bryder... fe ddaethon ni a Cai yma i fynd am dro am y tro olaf am ei fod yn caru'r môr.

"Mae angen cadw diogelwch a llonyddwch Tŷ Hafan fel ag y maen nhw. Fel arall... fydd plant ddim yn gallu cael yr un profiad a Cai."

Cynlluniau yn 'drasiedi'

Ym mis Gorffennaf fe gyflwynwyd cais cynllunio er mwyn gosod celloedd storio ar y safle ar Ffordd Hayes, Sili, ond mae cais newydd wedi'i gyflwyno er mwyn gosod carafanau yno bellach.

Fe ddywedodd mam arall y byddai cael parc gwyliau ger Tŷ Hafan yn "drasiedi".

"Mae teuluoedd yn teimlo'n ddiogel yma," medd Marie Jones.

"Dwi'n meddwl y byddai'r newid yn gwneud i ni feddwl yn wahanol am sut y'n ni'n defnyddio Tŷ Hafan, sy'n drist iawn."

Fe wnaeth Tŷ Hafan agor yn Sili, Bro Morgannwg yn 1999

Mae Tŷ Hafan wedi gwrthwynebu'r cais cynllunio yn ffurfiol, ac yn bwriadu parhau i'w wrthod "er budd y plant a'u teuluoedd sy'n dod o bob cwr o Gymru i ddefnyddio ein cyfleusterau".

"Mae llonyddwch, diogelwch, a phreifatrwydd ein hosbis a gardd coffa yn hollbwysig i ni, ac i'r rheiny rydyn ni'n gofalu amdanyn nhw."

Fe ddywedodd Henry Danter, sydd am agor y parc gwyliau, mai dyma fyddai'r "cymydog gorau posib i Dŷ Hafan".

"Mae Llywodraeth Cymru eisiau denu pobl i Gymru gyda thwristiaeth a swyddi, ac fe fydd Henry Danter yn gwneud y safle yma'n hardd iawn," meddai Mr Danter.

Dywedodd Henry Danter y byddai'r parc gwyliau o fudd i'r hosbis

"Maen nhw'n dweud ei fod yn agos at Dŷ Hafan, ond mae'n rhaid cerdded o leiaf 10 munud i gyrraedd yno."

Ychwanegodd y byddai ardal llawn coed wrth ymyl Tŷ Hafan yn aros, ac y byddai'r parc o fudd i'r hosbis gan y byddai'n cynnig llety i bobl sydd am ei ddefnyddio.

Mae'r safle rhwng Tŷ Hafan a Beechwood College, sy'n cynnig addysg arbennig i bobl ifanc ag anghenion cymhleth.

Mae'r coleg hefyd wedi gwrthwynebu'r cynllun, gan ddweud y byddai unrhyw gynllun i newid yr ardal ger y coleg "heb os yn cael effaith ddifrifol ar iechyd a lles ein disgyblion".