Undeb myfyrwyr yn gwahardd crysau glas a 'chinos'

Dywedodd Undeb Myfyrwyr Prifysgol Caerdydd eu bod wedi gweld "gwellhad sylweddol mewn ymddygiad yn y ciw" ers cyflwyno'r gwaharddiad

Mae trowsus 'chino' a chrysau glas wedi cael eu gwahardd gan Undeb Myfyrwyr Prifysgol Caerdydd oherwydd "ymddygiad peryglus" gan rai myfyrwyr.

Dywedodd yr undeb y bydd pobl sy'n gwisgo dillad o'r fath - sy'n draddodiadol yn cael ei gysylltu â chlybiau chwaraeon - yn cael eu gwrthod ar nosweithiau Mercher.

Nos Fercher yw'r noson ble mae clybiau chwaraeon fel arfer yn mynd ar nosweithiau allan gyda'i gilydd.

Daw yn dilyn ymddygiad "difeddwl, peryglus a hynod anghyfrifol" gan grŵp o fyfyrwyr gwrywaidd yn y ciw i fynd i mewn i'r undeb ar 4 Hydref.

Mewn datganiad dywedodd llefarydd ar ran Undeb Myfyrwyr Prifysgol Caerdydd bod y "cyfyngiadau presennol ar ddillad yn rhai dros dro, heb eu hanelu at grŵp penodol".

Ychwanegon nhw fod y gwaharddiad yn "ymateb yn uniongyrchol i ddigwyddiad diweddar penodol".

"Bydd cefnogi myfyrwyr i gael hwyl mewn modd diogel bob amser yn sylfaenol i'r ffordd rydym yn trefnu ac yn cyflwyno digwyddiadau."

'Gwellhad sylweddol mewn ymddygiad'

Mewn e-bost at aelodau Undeb Athletau y brifysgol, dywedodd Undeb y Myfyrwyr: "Yn ffodus fe lwyddodd staff diogelwch i ymyrryd a gwasgaru'r dorf, ond fe allai'r sefyllfa fod wedi datblygu'n ddigwyddiad mawr."

Dywedodd Undeb y Myfyrwyr eu bod wedi gweld "gwellhad sylweddol mewn ymddygiad yn y ciw" ers cyflwyno'r gwaharddiad.

"Os oes unrhyw un yn gwybod pwy oedd yn gyfrifol am achosi'r digwyddiad yma, rwy'n eu hannog i'w adrodd i staff yr Undeb Athletau fel y gellir delio gyda'r mater," meddai'r e-bost.

"Tra'n bod yn deall nad yw hyn yn ffafriol i bawb, nes ydyn ni'n hyderus fod ymddygiad o'r fath wedi diflannu, byddwn yn parhau gyda'r gwaharddiad."

Dywedodd Prifysgol Caerdydd mai mater i Undeb y Myfyrwyr a'r Undeb Athletau oedd y mater dan sylw.