Nicky John: Gorbryder ar ôl canser Emi 'hefo ni am byth'

Bydd gêm bêl-droed arbennig yn cael ei chynnal ddydd Sul wrth i deulu un o wynebau cyfarwydd y bêl gron yng Nghymru ddiolch am driniaeth canser eu merch.

Bydd y gêm yn cael ei chynnal yn enw Emi, merch cyflwynydd a sylwebydd Nicky John, i godi arian at Ysbyty Gwynedd ac Ysbyty Alder Hey yn Lerpwl.

Fe dderbyniodd Emi ddiagnosis o ganser ar yr arennau ym Mawrth 2022, a hithau ond yn flwydd oed.

Ond wedi derbyn cemotherapi, dywedodd Nicky - sydd fwyaf adnabyddus am gyflwyno rhaglenni Sgorio ar S4C - fod Emi yn gwneud yn "grêt", er ei bod yn parhau i gael ei monitro gan yr ysbyty yn Lerpwl.

"Ar hyn o bryd mae hi'n gwneud yn grêt ac yn rhedeg rings rownd ni yma," meddai Nicky ar raglen Dros Frecwast BBC Radio Cymru.

Cae-y-Castell yn Y Fflint fydd yn cynnal y gêm, rhwng rhai o gyn-chwaraewyr CPD Wrecsam a thîm o enwogion Uwch Gynghrair Cymru.

Mae Emi, merch y gyflwynwraig Nicky John, wedi bod yn brwydro yn erbyn canser yr arennau

Ychwanegodd Nicky: "Mae hi wedi gorffen ei thriniaeth cemotherapi ers diwedd Mawrth felly 'da ni mewn sefyllfa ar hyn o bryd lle 'da ni'n mynd bob tri mis i gael scans yn Alder Hey ac mae'r nesaf ym mis Rhagfyr.

"Ond mae hi'n gwneud yn grêt."

• ‘Y caredigrwydd sydd yna yn ystod y cyfnodau mwyaf tywyll’

• 'Nath o ddim croesi fy meddwl fod rhywbeth mor fawr o'i le'

"Y diabetes ydi'r peth diweddaraf 'da ni'n delio hefo, felly mae hynny'n her wahanol.

"Ond 'da ni mor lwcus i fod yn sefyll lle rydan ni heddiw a weithiau mae edrych 'nôl ar y ffon ar luniau o le yr oeddan ni flwyddyn a hanner yn ôl yn agoriad llygad, ac yn atgoffa rhywun faint o heriol mae'r siwrna wedi bod a be' mae hi wedi bod drwyddo."

Emi a'i brawd, Sam

Yn wynebu ei gilydd yn Y Fflint brynhawn Sul fydd rhai o gyn-chwaraewyr CPD Wrecsam a Senseless FC, sef tîm yn cynnwys rhai o gyn-chwaraewyr Uwch Gynghrair Cymru.

"Mi ddoth cadeirydd Wrexham Legends, John Morris, ata'i a son rhai misoedd yn ôl bellach am ei gynlluniau i drefnu gêm rhwng rhai o gyn-wynebau Wrecsam a falle rhai o gyn-wynebau Uwch Gynghrair Cymru hefyd.

"Mae na ddipyn o sgyrsiau wedi bod, ac mi ofynnwyd os fyswn yn fodlon iddyn nhw ei chwarae yn enw Emi a bod unrhyw arian yn mynd at elusen o'n dewis ni fel teulu.

"Mae hynny'n amlwg yn rywbeth sy'n eich cyffwrdd chi ac yn reit emosiynol i ddweud y gwir, ond hefyd yn adlewyrchiad o sut mae pawb wedi bod yn meddwl amdanon ni ac yn dymuno'r gorau i ni yn ystod y flwyddyn a hanner diwetha'."

Emi a'i thad, Gwion

Dywedodd fod y dymuniadau hynny wedi cynnig cryfder i'r teulu mewn cyfnod anodd: "I fod yn hollol onest dim ond rŵan, yn ystod y cyfnod yma mae rhywun yn edrych nôl a sylweddoli pa mor anodd oedd beth aethon ni drwyddo fo.

"'Da ni mewn sefyllfa eithriadol o ffodus rwan lle 'da ni'n gallu edrych yn ôl a dweud fod ni wedi dod drwy hyn gobeithio, ond nid pawb sydd mor ffodus o gyrraedd y pwynt yma.

"A dwi'n meddwl fel rhiant hefyd, ar ôl bod drwy rhywbeth fel hyn, dwyt ti byth yn colli'r gor-bryder yna o boeni am fynd drwy rywbeth tebyg eto.

"Fydd hynny'n rywbeth fyddwn yn cario hefo ni am byth."

'Y teulu pêl-droed yng Nghymru'

Ychwanegodd Nicky fod y gefnogaeth gan deulu a ffrindiau, yn ogystal â'r gymuned bêl-droed yng Nghymru, wedi bod o gymorth iddyn nhw.

"Un peth sydd 'di dod a ni drwy'r holl beth ydi'r gefnogaeth 'da ni wedi ei gael.

"Mae pobl wedi bod mor ffeind, mae 'na adegau, yn enwedig yn y dyddiau cynnar yna, doedd yr un bore neu nos lle oeddwn yn mynd i fy ngwely neu codi yn y bore heb llwyth o negeseuon gan bobl ar fy ffon, yn enwedig y teulu pêl-droed yma yng Nghymru 'de.

"Roedd prydau o fwyd yn cyrraedd y drws, bob mathau o bethau fel'na.

"Felly heb y gefnogaeth yma gan ffrindiau a theulu, a theulu ehangach y byd pêl-droed yng Nghymru, dwi ddim yn siwr sut fysan ni wedi goroesi, ond dwi mor ddiolchgar amdanyn nhw."

Bydd cic gyntaf y gêm ar Gae-y-Castell, Y Fflint, am 14:00 brynhawn Sul, 29 Hydref.