Fflat socian a llawn llwydni yn 'addas i fyw ynddo'

Dywedodd Emma Helliar ei bod hi a'i mab yn aros gyda ffrindiau dros dro wedi i ddŵr ddifrodi ei fflat

Mae asiantaeth gosod tai wedi dweud wrth fenyw fod ei fflat, a gafodd ei ddifrodi gan ddŵr, yn addas i fyw ynddo er gwaethaf y ffaith bod y carpedi yn socian a larymau tân wedi torri.

Dywedodd Emma Helliar, 40 oed, fod ei fflat wedi cael difrod ddŵr o ganlyniad i ollyngiad o'r fflat uwchben.

Roedd ei fflat yng Nghaerdydd mewn llanast llwyr ac yn llawn llwydni ac arogl drwg.

Fe wnaeth ei hasiant osod dadleithydd (dehumidifier) yn ei lolfa a dweud ei fod yn iawn i ddychwelyd i'r fflat wedi dim ond pum diwrnod.

Dywedodd yr asiantaeth - Kingstons Residential - eu bod yn "deall yr anghyfleustra", a'u bod yn ceisio datrys y sefyllfa "cyn gynted â phosib".

'Anghrediniol'

Dywedodd Emma fod swm enfawr o ddŵr wedi llifo i'w chartref hi a'i mab naw oed o'r fflat uwchben ar 3 Tachwedd.

Esboniodd fod y carpedi yn socian o dan draed a bod bron i holl eiddo ei mab yn llawn dŵr.

Cafodd y gwasanaeth tân eu galw i'r safle yn ardal yr Eglwys Newydd yng Nghaerdydd.

Fe symudodd Emma a'i mab William i dŷ eu ffrindiau dros dro.

Dywedodd Emma fod bod oddi cartref wedi bod yn anodd i'w mab William

Tair wythnos yn ddiweddarach, dywedodd fod y straen o "ymladd" gyda'r asiantaeth a'r cwmnïau yswiriant dros eu fflat wedi ei gorfodi i gymryd amser i ffwrdd o'r gwaith.

Dywedodd: "Mae fy mab wirioneddol yn dioddef wrth beidio cael lle i'w hun a bod i ffwrdd o'i eiddo. Mae wedi bod yn anodd iawn arno."

Dywedodd Emma, ar 8 Tachwedd, ei bod wedi derbyn e-bost gan Kingston Residential, sydd wedi ei weld gan y BBC, yn dweud bod y "fflat wedi ei archwilio a'i fod yn addas i fyw ynddo".

"Mae'r ffaith fod yr asiant wedi dweud ei fod yn addas i fyw ynddo yn anghrediniol," meddai.

Pan aeth i weld y fflat, dywedodd Emma fod y carped yn dal yn wlyb dan draed a bod yna arogl o lwydni.

Nid oedd yn gallu gweld bod unrhyw beth wedi ei wneud i drwsio unrhyw beth. Ond roedd y trydan ymlaen ac roedd dadleithydd wedi ei osod yn y lolfa.

Roedd hi hefyd wedi darganfod bod y ddau larwm tân yn y fflat wedi torri, ac roedd hi'n poeni a oedd y trydan yn ddiogel i'w ddefnyddio.

Roedd y difrod mor wael, roedd modd gweld y dŵr ar y brics o'r tu allan i'r fflat

"Dyw e ddim yn rhesymol i ddychwelyd" dywedodd Emma, gan esbonio mai ei gofid mwyaf yw y byddai'r llwydni yn cael effaith ar iechyd ei mab.

Dywedodd bod y cwmni yswiriant wedi dweud bod angen taflu celfi, dillad a theganau William o ganlyniad i effaith y llwydni.

"Mae wir yn anodd esbonio i rywun sydd bron yn 10 oed bod yn rhaid i'w holl eiddo fynd i'r sgip," meddai Emma.

"Dyw e ddim yn amgylchedd saff i fod ynddo, gyda'r holl lwydni a'r diffyg larymau tân, a dy'n nhw methu sicrhau na fyddwn yn cael sioc drydanol."

• Gwaith diogelwch tân adeiladau uchel 'i gymryd tair blynedd'

• Diswyddo gwerthwr tai wedi ymchwiliad ymddygiad

• Blaenafon: Tenantiaid yn brwydro yn erbyn lleithder a llwydni yn eu cartrefi

Mae ebyst rhwng Emma a Kingstons Residential yn ystod y pythefnos canlynol yn awgrymu na chafodd y problemau yma eu datrys.

Fe holodd mewn am adroddiad archwilio diogelwch trydanol, ond fe anfonodd y cwmni gopi o adroddiad a wnaed ar 7 Gorffennaf 2023 ati - fisoedd cyn y difrod dŵr.

"Dydw i ddim yn gwybod os ydyn nhw hyd yn oed wedi bod i'r eiddo," meddai Emma.

'Delio gyda'r mater cyn gynted â phosib'

Dywedodd Kingstons fod "dadleithydd diwydiannol" wedi ei osod yn y fflat i helpu i atal llwydni a bod y larymau tân yn gweithio bryd hynny.

Ond gan fod y gollyngiad dŵr wedi dod o eiddo arall, dywedodd eu bod yn "aros am gyfarwyddyd pellach gan y cwmni yswiriant ynghylch pa gamau eraill y mae modd eu cymryd i adfer yr eiddo i'n safonau arferol".

Ychwanegodd fod y landlord wedi cael ei gynghori i gynnal archwiliad tân newydd, sydd "yn cael ei wneud".

"Er ein bod yn deall yr anghyfleustra, rydym yn delio gyda'r mater cyn gynted â phosib."