Dyn wedi'i barlysu wrth nofio'n y môr ar Nos Galan

Mae Dan Richards, yma gyda'i bartner Anna Thomas, wedi bod yn cael triniaeth yn Nhreforys ers tair wythnos

Mae partner dyn 35 oed a gafodd ei barlysu ar ôl damwain yn y môr wedi disgrifio'r mis diwethaf fel "hunllef".

Fe gafodd Dan Richards, nofiwr profiadol o Abertawe, anaf i'w wddf ym Mae Langland ganol dydd ar ddiwrnod ola'r flwyddyn.

"Ro'n ni just yn mynd i'r dŵr… nes i blymio mewn i'r don a 'naeth e just cwympo," meddai Dan.

"'Naeth y don fy nhroi i, ac fe darodd fy mhen yn erbyn y tywod.

"Golau llachar, sŵn mawr. Ro'n i wedi fy mharlysu yn syth."

Mae Dan ac Anna wedi hen arfer mynd i'r môr

Fe welodd ei bartner, Anna Thomas, 38, y ddamwain yn digwydd.

"Yn y lle cynta' ro'n i'n meddwl mai jôc oedd e," meddai.

"Ond wedyn glywes i: 'Helpwch fi. Alla' i ddim symud fy nghoesau'.

"Roedd fy mam ar y traeth. Dywedodd hi bo' fi'n sgrechian. Ro'n i'n sgrechian ar i bobl ein helpu ni."

'Alla i dal ddim credu'

Fe ddaeth ambiwlans i helpu Dan cyn i'r ambiwlans awyr ddod i'w gludo i ysbyty ym Mryste.

Cafodd driniaeth ar ei wddf yno, cyn cael ei symud i Ysbyty Treforys yn Abertawe.

"Alla' i dal ddim credu sut aeth pethe mor o'i le. Doedd hi ddim y don fwyaf, ddim yr amodau gwaethaf," meddai Dan.

"Ond ry'ch chi'n taro'ch pen a ie - newid byd."

Mae Dan Richards yn nofiwr a syrffiwr profiadol

Mae Dan wedi bod yn cael triniaeth yn Nhreforys ers tair wythnos.

"Mae'r staff yma'n grêt. Mae gen i'n nheulu i gyd yma bob dydd," dywedodd.

Mae Anna wedi bod yn treulio bob dydd gyda Dan yn yr ysbyty.

Dywedodd bod y mis diwethaf wedi bod yn eithriadol o anodd.

"Ry'n ni'n byw hunllef. Fydden i ddim yn dymuno hyn ar fy ngelyn pennaf," meddai.

"Dyw e ddim yn teimlo'n real. Ond nid y diwedd yw hyn."

Dywedodd Dan ei fod eisiau codi ymwybyddiaeth am beryglon y môr

Dywedodd Dan nad yw'n gwybod beth a ddaw yn y dyfodol, ond mae'n cadw'n bositif.

"Mae rhai wedi dweud wrthon ni y gallai'r broses adfer gymryd dwy flynedd - rhai eraill wedi dweud y gallai fod am byth."

Mae'r ddau wedi bod yn edrych ar driniaeth celloedd stem neu driniaeth breifat.

"Ry'n ni'n gwybod pa mor ddrud a pha mor hir y bydd y siwrne'n ei chymryd," dywedodd Anna.

"Dy'n ni ddim yn naïf."

'Dal i fynd'

Dywedodd Dan mai ei nod yw "cael gymaint o ddefnydd yn ôl yn fy mreichiau a choesau ag sy'n bosib".

"Just dal i fynd. A rhoi'n ôl i'r bobl sydd wedi'n helpu ni."

Dywedodd hefyd ei fod eisiau codi ymwybyddiaeth am beryglon y môr.

"Does dim rhaid i'r amodau fod yn frawychus ac yn fawr. Fe all pethau bach arwain at bethau mawr i ddigwydd."