Cyn-chwaraewr rygbi, Dafydd Jones, yn cyfaddef iddo yfed a gyrru

Cyfaddefodd Jones ei fod wedi yfed cwrw cyn y gwrthdrawiad

Mae cyn-chwaraewr rygbi rhyngwladol wedi pledio'n euog i gyhuddiad o yfed a gyrru.

Ymddangosodd Dafydd Jones, cyn-chwaraewr y Scarlets a Chymru sy'n 44 oed ac o Borth-y-rhyd, Sir Gaerfyrddin, yn Llys Ynadon Llanelli fore Mawrth.

Cafodd ei ddal gyda 71mg/100ml o alcohol yn ei system yn dilyn gwrthdrawiad ar yr A40 rhwng Sanclêr a Chaerfyrddin ar 11 Ionawr.

Y lefel cyfreithiol yw 35mg/100ml.

Cyfaddefodd Jones ei fod wedi yfed cwrw cyn y gwrthdrawiad

Clywodd y llys fod Jones wedi cyfaddef i'r heddlu ei fod wedi bod yn yfed cwrw cyn y gwrthdrawiad a ddigwyddodd am tua 18:30 ar y diwrnod hwnnw.

Dywedodd ei gyfreithiwr ei fod wedi "camfarnu" ac heb gael unrhyw fwyd cyn taro i mewn i gefn tractor gyda threlar oedd "heb oleuadau".

Cafodd Jones ei wahardd rhag gyrru am 18 mis, a chafodd orchymyn i dalu cyfanswm o £1,054 mewn dirwy a chostau llys.

Os fydd yn cwblhau cwrs ymwybyddiaeth yfed a gyrru cyn Ionawr nesaf, bydd y gwaharddiad yn cael ei ostwng.