Rhwyfwr o Borthmadog wedi marw 'ar ôl anaf damweiniol'

Michael Holt yn Pasito Blanco, Gran Canaria ddiwedd Ionawr, cyn iddo ddechrau ar ei daith dros yr Iwerydd

Bu farw rhwyfwr o Gymru ar ôl dioddef anaf damweiniol wrth geisio rhwyfo 3,000 o filltiroedd ar draws Cefnfor yr Iwerydd, clywodd cwest.

Roedd Michael Holt o Borthmadog wedi cwblhau 700 milltir o'r her i godi arian i elusennau, pan gafodd ei gwch ei daro gan don.

Cafodd ei ddarganfod yn farw gan gwch pysgota bron i fis ar ôl cychwyn ei daith.

Clywodd y cwest yn Lerpwl bod Mr Holt, oedd â diabetes math 1, wedi "dioddef anaf i'w law" pan gafodd y cwch ei daro gan y don.

• Casglu £20,000 i gael corff rhwyfwr o Borthmadog yn ôl i Gymru

• Dyn o Borthmadog wedi marw tra'n rhwyfo'r Iwerydd

Roedd Michael Holt wedi hyfforddi am ddwy flynedd cyn ymgymryd â'r her o rwyfo o Gran Canaria i Barbados ar ei ben ei hun.

Fe ddechreuodd ei daith ar 27 Ionawr, ac mewn sgwrs gyda Cymru Fyw fe ddywedodd ei fod yn disgwyl i'r daith "gymryd rhwng 50-110 o ddyddiau".

Yn ystod cyfnod cynta'r daith roedd wedi gorfod ymdopi â gwyntoedd cryfion, colli offer a salwch.

Ond tua 700 milltir o fan cychwyn y daith, ar ôl iddo golli cyswllt â'i deulu a'i dîm cefnogi, cafodd ei ddarganfod yn farw.

Cafodd cwch a chorff Michael Holt eu cludo i un o ynysoedd Cape Verde

Cafodd marwolaeth Mr Holt ei gofnodi yn ynysoedd Cape Verde oddi ar arfordir gorllewin Affrica, ac fe lansiwyd ymgyrch i godi £20,000 er mwyn ceisio cael ei gorff yn ôl adref.

Clywodd y cwest bod ei gorff wedi cael ei archwilio gan ddoctor wnaeth nodi mai achos y farwolaeth oedd "trawma o ganlyniad i anaf damweiniol".

'Marwolaeth drasig, ddamweiniol'

Dywedodd y crwner Andre Rebello: "Roedd hon yn farwolaeth drasig, ddamweiniol."

Dywedodd brawd Michael, David Holt ei fod yn ofnadwy o falch o'r hyn mae o wedi ei gyflawni.

"Er yr hyn ddigwyddodd, mae rhwyfo ar y môr agored am 24 diwrnod yn anhygoel," meddai.

"Mae'n siŵr bod 'na reswm nad oes unrhyw un gyda diabetes math 1 wedi rhwyfo ar draws Cefnfor yr Iwerydd o'r blaen, ond pan roedd Michael yn cael syniad yn ei ben, dyna ni wedyn!"