Cyflogau rygbi 'ddim yn gynaliadwy'

Bu Roger Lewis yn brif weithredwr Undeb Rygbi Cymru ers 2006

Yn ôl prif weithredwr Undeb Rygbi Cymru, Roger Lewis, mae'r cyflogau sy'n cael eu cynnig i chwaraewyr rygbi yn "gwbl anghynaliadwy".

Roedd Mr Lewis yn siarad yng nghanol pryderon y bydd nifer o chwaraewyr amlycaf Cymru yn gadael rhanbarthau Cymru yn sgil cyhoeddi uchafswm cyflog ddydd Mawrth.

Dywedodd: "Gallan ni ddim cystadlu gyda'r symiau anferth o arian sy'n cael eu taflu i'r gêm yn Ffrainc ar hyn o bryd.

"Mae'r symiau yn fy marn i yn gwbl anghynaliadwy."

Cefnogi

Mae Mr Lewis wedi cefnogi safiad y rhanbarthau gan ddweud y gallai'r arian sy'n cael ei gynnig i dargedu chwaraewyr o Gymru danseilio cynaliadwyedd y gamp.

Ychwanegodd: "Yn syml gall rygbi ddim fforddio talu'r cyflogau sy'n cael eu talu yn Ffrainc ar hyn o bryd os yw'r gêm am oroesi a ffynnu.

"Yr hyn sy'n rhaid i ni ei wneud yw cynnig cyflog i'n chwaraewyr yng Nghymru sy'n deg a rhesymol, ac rwy'n credu ein bod yn gwneud hynny.

"Yn sicr mae hynny'n wir am Undeb Rygbi Cymru, ac rwy'n credu bod y rhanbarthau yn ceisio gwneud hynny hefyd, ac mae'n rhaid i ni fuddsoddi yn rhengoedd isaf y gêm."

O'r tymor nesaf, bydd rhanbarthau Cymru yn gwario uchafswm o £3.5 miliwn ar garfan o 38 o chwaraewyr ar gyfer cystadleuthau Cwpan Heineken a Chwpan Her Amlin.

Gan nad oes cyfyngiad o'r fath yn Ffrainc, mae sibrydion y bydd Gethin Jenkins ac Adam Jones ymhlith yr enwau mawr sy'n ystyried gadael am y wlad honno.

Mae clybiau yn uwchgynghrair Lloegr yn gweithredu sustem debyg, ond gydag uchafswm cyflog o £4 miliwn ar gyfer y garfan.

Mae ffigyrau amlwg gyda rhanbarthau'r Gleision, Y Dreigiau, Y Gweilch a'r Scarlets wedi galw ar Undeb Rygbi Cymru i ddarparu mwy o arian er mwyn perswadio sêr rygbi Cymru i beidio symud i Ffrainc, Lloegr neu wledydd eraill.

Clo'r Dreigiau, Luke Charteris, yw'r diweddaraf i gyhoeddi y bydd yn gadael Cymru, ac fe allai fod yn yr un tîm a James Hook yn Perpignan y tymor nesaf.

Mae asgellwr y Dreigiau, Aled Brew, yn darged i Perpignan hefyd yn ôl adroddiadau, ac mae'r Scarlets yn gofidio y gallai nifer o'u sêr ifanc fel Rhys Priestland, George North, Jonathan Davies a Scott Williams gael eu targedu.