Y Ffagl Olympaidd wedi cychwyn ar daith o amgylch y DU

Ben Ainslie yn barod ar gyfer cychwyn y daith hanesyddol

Mae'r Ffagl Olympaidd wedi cychwyn ar 70 niwrnod o daith o amgylch y DU cyn cychwyn y Gemau yn Llundain fis Gorffennaf.

Yr hwyliwr Olympaidd Ben Ainslie gafodd yr anrhydedd o fod y person cyntaf i gludo'r Ffagl ar daith 8,000 milltir a ddechreuodd o Land's End am 7.15am.

Roedd tyrfa wedi ymgasglu wrth i'r Ffagl gael ei chludo ar hyd strydoedd lleol, gyda miloedd allan ar hyd strydoedd Cernyw.

Yn ystod y diwrnod fe fydd dros 100 o bobl yn ei chludo gan gynnwys y nofiwr Olympaidd Duncan Goodhew a'r rhwyfwr Michael Lapage enillodd fedal arian yn y Gemau yn 1948.

Bydd yn teithio drwy Gernyw ddydd Sadwrn ac i mewn i Ddyfnaint wrth i'r dathliadau cyntaf gael eu cynnal nos Sadwrn yn Plymouth.

Fe wnaeth y Fflam Olympaidd gyrraedd nos Wener ar awyren arbennig o Athen i faes awyr Culdrose yng Nghernyw.

'Awyrgylch gwych'

Roedd y fflam ei hun wedi ei gadw mewn llusern.

Y "gusan" wrth i Ben Ainslie drosglwyddo'r fflam i Tassy Swallow

Yno y bu'r fflam dros nos cyn ei chludo i Land's End mewn hofrennydd.

"Mae'n rhywbeth na wna i ei anghofio," meddai Ainslie.

"Roedd yn awyrgylch gwych.

"Ond mae'n ôl i realiti yfory a hyfforddi ar gyfer y Gemau."

Bydd y fflam yn cyrraedd y Stadiwm Olympaidd yn Stratford ar Orffennaf 27 ar gyfer y seremoni agoriadol.

Cyn hynny bydd yn ymweld â Chymru rhwng Mai 25-30.

Bydd dros 80 o drefi, dinasoedd a phentrefi yn cael cyfle i weld y ffagl wrth iddo gael ei chludo gan tua 500 o redwyr drwy Gymru.

Bydd y ffagl yn cyrraedd Trefynwy ar Fai 25.

Fe'i cludir drwy de a gorllewin Cymru, drwy Geredigion ac ar draws y gogledd, gan adael y Trallwng ar Fai 30.

Bydd y ffagl yn aros dros nos yng Nghaerdydd, Abertawe, Aberystwyth a Bangor gyda digwyddiadau yn y pedair tref.