Bellamy: Coleman 'ar ben ei ddigon'

Mae Bellamy yn aelod o garfan Cymru fydd yn herio Mecsico

Mae Rheolwr Tîm Pêl-droed Cymru, Chris Coleman, wedi dweud ei fod ar ben ei ddigon fod Craig Bellamy wedi rhoi'r gorau i'r posibilrwydd o ymddeol o bêl droed rhyngwladol.

Er gwaethaf sibrydion am ei ymddeoliad posib, mae Bellamy'n aelod o garfan Cymru fydd yn herio Mecsico yn Efrog Newydd ddydd Sul.

Roedd y chwaraewr 32 oed wedi bod yn ystyried ymddeol wedi marwolaeth ei gyfaill a chyn-reolwr Cymru, Gary Speed, y llynedd.

Enillodd ei 68fed gap i'w wlad yng ngêm goffa Gary Speed yn erbyn Costa Rica ym mis Chwefror.

'Mwy o obaith'

"Rwy'n credu bod Craig yn gwybod ei fod yn rhan fawr o'n cynlluniau," meddai Coleman.

"Mae'n deall y bydd mwy o obaith i Gymru os yw'n aelod o'r garfan."

Bydd Cymru'n chwarae un gêm gyfeillgar arall yn erbyn Bosnia-Herzegovina ar Awst 15 cyn dechrau eu hymgyrch ar gyfer Cwpan y Byd 2014.

Ym mis Medi bydd gemau cyntaf Cymru yn erbyn Gwlad Belg a Serbia.

'Tymor hir'

"Rhaid inni ofalu am Craig am fod ei anaf pen-glin yn un tymor hir ac mae'n anodd iddo chwarae dwy gêm mewn wythnos," meddai Coleman.

"Mae Craig yn ddyn ddi-flewyn ar dafod ac nid yw pawb yn hoffi hynny ond nid yw pobl yn gallu cytuno am bopeth.

"Ond mae ychydig o anghytuno yn gallu bod yn iach, yn enwedig mewn timau llwyddiannus."

Fydd Gareth Bale a Joe Ledley ddim yn chwarae i Gymru yn y gêm gyfeillgar yn erbyn Mecsico ddydd Sul.

Mae'r ddau a David Vaughan (Sunderland), Darcy Blake (Caerdydd) a Neal Eardley (Blackpool) wedi eu hanafu.

"Wrth gwrs, mae colli chwaraewyr yn siomedig ond mae hyn yn rhoi cyfle i rai o'n chwaraewyr ifanc yn erbyn tîm da fel Mecsico," meddai Coleman.

Bydd gêm Cymru yn erbyn Mecsico yn cael ei darlledu ar BBC Radio Cymru am 8.00pm nos Sul.