Gwobr Personoliaeth Chwaraeon BBC Cymru: Jonathan Davies

Mae chwe enw ar y rhestr fer ar gyfer Gwobr Personoliaeth Chwaraeon y Flwyddyn BBC Cymru.

Y pêl-droediwr Gareth Bale, y seiclwr Elinor Barker, y para-athletwr Aled Siôn Davies, y chwaraewr rygbi Jonathan Davies, yr ymladdwr Judo Natalie Powell a'r seiclwr Geraint Thomas sydd ar y rhestr fer.

Mae'r canolwr Jonathan Davies wedi bod yn un o berfformwyr disgleiriaf rygbi'r undeb ar y llwyfan domestig a rhyngwladol yn 2017, ac fe gafodd ei enwi'n Chwaraewr y Gyfres Y Llewod yn Seland Newydd.

Dechreuodd y chwaraewr 29 oed ymgyrch y Chwe Gwlad eleni gyda chais ym muddugoliaeth Cymru o 33-7 yn erbyn Yr Eidal, ond dilynwyd hynny gyda dwy golled yn erbyn Lloegr a'r Alban.

Er iddyn nhw guro Iwerddon mewn gêm gyffrous yng Nghaerdydd, bu i golled arall yn y gêm olaf yn erbyn Ffrainc olygu y gorffennodd tîm Warren Gatland yn bumed yn y tabl.

Methodd rhanbarth Davies, y Scarlets, â chyrraedd rownd yr wyth olaf yng Nghwpan Pencampwyr Ewrop ond roedden nhw ar dân yn y Pro12.

Fe wnaethon nhw guro Leinster yn Iwerddon yn y rownd gynderfynol, er i'r asgellwr Steff Evans gael ei hel oddi ar y cae, cyn trechu tîm arall o Iwerddon, Munster - hefyd yn Nulyn - yn y rownd derfynol.

Roedd Davies yn un o'r chwe chwaraewr a sgoriodd gais wrth i'r tîm o Gymru ennill mewn steil o 46-22 i gipio'r teitl am y tro cyntaf ers 2004.

Fe wnaeth safon chwarae Davies olygu iddo gael ei ddewis i garfan Y Llewod ar gyfer y daith i Seland Newydd yn yr haf.

Chwaraeodd y canolwr bob munud o'r tri phrawf yn erbyn y Crysau Duon wrth i'r Llewod greu hanes drwy sicrhau cyfres gyfartal, ac fe wnaeth chwarae rhagorol Davies wrth amddiffyn ac ymosod olygu iddo gael ei enwi'n Chwaraewr y Gyfres i'r Llewod.

Ond nawr bydd raid i Gymru a'r Scarlets ymdopi heb Davies am ran helaeth o dymor 2017-18 gan iddo ddioddef anaf difrifol i'w droed yng ngêm agoriadol Cyfres yr Hydref ym mis Tachwedd yn erbyn Awstralia, sy'n debygol o'i gadw allan am chwe mis.

Cafodd Jonathan Davies ei enwi'n Chwaraewr y Gyfres Y Llewod yn Seland Newydd

Ganwyd Davies yn Solihull yn Lloegr, ond yn fuan symudodd ei rieni yn ôl i galon y gymuned Gymraeg yn Sir Gaerfyrddin er mwyn rhedeg tafarn y Fox & Hound ym Mancyfelin, a dyna sut y cafodd Davies y llysenw 'Fox'.

Mae ei frawd iau, James, hefyd yn chwarae i'r Scarlets fel blaenasgellwr ac enillodd fedal arian Olympaidd gyda thîm saith-pob-ochr Prydain yn Rio 2016.

Daeth Jonathan Davies drwy system academi'r Scarlets, gan chwarae ei gêm gyntaf i'r tîm cyntaf yn 2006. Fe gafodd alwad i chwarae i Gymru yn 2009 a chwaraeodd ei gêm brawf gyntaf yn erbyn Canada yn Toronto.

O fewn dwy flynedd roedd Davies wedi hawlio'r crys rhif 13 iddo'i hun a dechreuodd chwech o saith gêm Cymru yng Nghwpan y Byd 2011 - gan sgorio tri chais yn y broses wrth i Gymru gyrraedd y rownd gynderfynol.

Aeth Davies yn ei flaen i helpu ei wlad ennill Pencampwriaeth y Chwe Gwlad ddwy flynedd yn olynol yn 2012 - gan ennill y Gamp Lawn hefyd - a 2013. Erbyn hyn mae wedi ennill 65 cap i Gymru ac wedi sgorio 13 cais.

Gweddill y rhestr fer:

• Gareth Bale

• Elinor Barker

• Aled Siôn Davies

• Natalie Powell

• Geraint Thomas

Cafodd ei ddewis ar gyfer taith Y Llewod yn 2013 a - fel yn 2017 - chwaraeodd bob munud o bob prawf wrth i'r Llewod sicrhau eu buddugoliaeth gyntaf yn Awstralia ers 1989.

Ymunodd y canolwr â Clermont Auvergne yn 2014 ar gytundeb dwy flynedd gan helpu'r tîm o Ffrainc gyrraedd rownd derfynol Cwpan Pencampwyr Ewrop a'r Top 14 yn 2015.

Ond daeth ei flwyddyn i ben â mwy o siom o ganlyniad i anaf, ac fe gollodd Cwpan y Byd 2015 oherwydd problem â'i ben-glin.

Dychwelodd Davies i Lanelli i ailymuno â'r Scarlets yn 2016, ar ôl cytuno ar gytundeb deuol ag Undeb Rygbi Cymru.

Bydd y bleidlais ar gyfer Gwobr Personoliaeth Chwaraeon y Flwyddyn BBC Cymru yn agor am 08:00 fore Llun, 27 Tachwedd, ac yn cau am 18:00 nos Sadwrn, 2 Rhagfyr.

Fe fydd y manylion pleidleisio llawn ar wefannau Chwaraeon BBC Cymru a Cymru Fyw wedi i'r bleidlais agor.

Bydd yr enillydd yn cael ei gyhoeddi ddydd Llun, 4 Rhagfyr.

Gwobr ar gyfer Cymru'n unig yw hon, a does dim cysylltiad rhyngddi a Gwobr Personoliaeth Chwaraeon y Flwyddyn y DU.