Toriadau i wasanaeth cerdd ysgolion Wrecsam gam yn nes

Byddai'r toriadau yn cynnwys £300,000 i wasanaeth cerdd

Mae Bwrdd Gweithredol Cyngor Wrecsam wedi cymeradwyo cyllideb arfaethedig ar gyfer 2018/2019 a 2019/20, sy'n cynnwys toriadau dadleuol i wasanaeth cerdd ysgolion a chodi tâl parcio i bobl anabl.

Fe fydd y penderfyniad terfynol yn cael ei wneud gan y cyngor llawn fis nesaf.

Mae Cyngor Wrecsam wedi llwyddo i arbed £52m ers 2008, ond mae'r bwrdd gweithredol eisiau gwneud arbedion pellach o £13m dros y ddwy flynedd nesaf.

'Gwrando'

Dywedodd Mark Pritchard, arweinydd y cyngor, fod y bwrdd gweithredol wedi gwrando ar farn bron i 4,000 o bobl yn dilyn ymgynghoriad cyhoeddus.

Ddydd Mawrth, fe gytunodd aelodau o'r bwrdd i gynyddu cyllid ar gyfer gofal cymdeithasol i oedolion, a chynnydd o 1.48% i gyllid ysgolion.

Yn ôl Mr Pritchard, roedd yr ymgynghoriad hefyd yn awgrymu nad oedd yna wrthwynebiad cryf i'r bwriad i gynyddu treth y cyngor 3.9%.

"Mae pobl Wrecsam yn cefnogi cynnydd o'r fath pe bai yn amddiffyn gwasanaethau," meddai.

• Pryder am barciau gwledig Wrecsam

• Arweinydd cyngor yn beirniadu gwariant GIG

Ond dywedodd y cynghorydd Marc Jones o Blaid Cymru fod 16,000 o bobl wedi arwyddo deiseb yn gwrthwynebu toriadau o £300,000 i wasanaeth cerdd ysgolion.

Dywedodd y dylai'r cyngor yn hytrach fod yn "dathlu sgiliau creadigol", gan ddangos arweiniad drwy dorri nôl ar gostau'r cyngor drwy leihau nifer y bwrdd gweithredol i saith aelod, gwrthod codiadau cyflog eleni a'r flwyddyn nesa', a thalu am iPads eu hunain.

"Dylwn ddangos esiampl," meddai.

Mae arweinwyr Cyngor Wrecsam am arbed £13m dros gyfnod o ddwy flynedd

Mae'r cyngor hefyd yn bwriadu cynnal ymgynghoriad ar faint y dylai pobl anabl dalu am ddefnyddio meysydd parcio'r cyngor.

Bwriad y cyngor yw codi tâl ar ddeiliad bathodynnau glas, ond gan roi awr yn ychwanegol am ddim.

Fe fydd argymhellion y bwrdd gweithredol yn cael eu trafod gan y cyngor llawn ym mis Chwefror.