Gwasanaethau gofal Powys 'angen gwella'

Mae angen cyflwyno gwelliannau sylweddol i wasanaethau gofal oedolion ym Mhowys, yn ôl arolygwyr.

Dywed adroddiad gan Arolygaeth Gofal Cymru nad oedd lefel y cymorth yn gyson a bod oedi wedi bod wrth asesu rhai pobl.

Daw'r sylwadau yn sgil adroddiad beirniadol y llynedd o wasanaethau plant yn y sir.

• Arolwg cynharach o ofal oedolion Powys

Dywedodd arweinydd Cyngor Powys, Rosemarie Harris, fod gwelliannau eisoes wedi eu cyflwyno a bod £6.5m yn cael ei wario dros gyfnod o 12 mis i gynyddu nifer y staff mewn gwasanethau rheng flaen.

Cafodd yr arolwg o wasanaethau oedolion ei gynnal ym mis Ionawr.

Yn ogystal â diffyg cysondeb o ran lefelau cymorth, dywed yr arolygwyr fod yna "oedi sylweddol" wedi bod wrth asesu a sicrhau gofal i rai oedolion bregus.

Ond fe wnaeth yr adroddiad hefyd roi clod i ymroddiad staff yn wyneb cyfyngiadau ariannol a bod yna "gydweithredu da gyda'r sector wirfoddol a grwpiau cymunedol."

Dywedodd Ms Harris eu bod yn cydnabod fod angen gwneud gwelliannau a bod y gwaith hynny eisoes wedi dechrau.