Gwerth £28,000 o gostau cyfreithiol i ymosodwr Finsbury

Mae dyn o Gaerdydd yrrodd fan i mewn i dorf o Fwslimiaid ger mosg yn Llundain wedi defnyddio gwerth £28,000 o gymorth cyfreithiol.

Fe wnaeth Darren Osborne, 48, yrru'r fan tuag at bobl oedd yn sefyll tu allan i fosg yng ngogledd y ddinas mis Mehefin y llynedd.

Yn ôl Asiantaeth Cymorth Cyfreithiol, gall unigolion sy'n hawlio cymorth cyfreithiol orfod cyfrannu at y gost - yn dibynnu ar eu hamgylchiadau,

Dangosodd cais rhyddid gwybodaeth fod costau Osborne wedi cyrraedd cyfanswm o £28,407.03 ar hyd yr achos.

Cafodd Makram Ali ei ladd wedi i fan Darren Osborne ei daro

Cafodd Osborne ei ddedfrydu i o leiaf 43 mlynedd dan glo cyn y bydd modd ystyried ei ryddhau.

• Ymosodiad Finsbury Park: Oes o garchar

• Ymosodiad mosg: Mwy o amser i holi dyn

• Ymosodiad Mosg: Arestio dyn o Gaerdydd

Tarodd y fan yn erbyn Makram Ali, 51, fu farw yn y digwyddiad, yn ogystal â naw o bobl eraill gafodd eu hanafu.

Mae'r costau hyd yma yn gymysgedd o werth £691.24 o gostau cyfreithwyr yn swyddfa'r heddlu, gwerth £26,948.99 am fargyfreithwyr a £766.80 o gostau cyffredinol eraill.

Dydi costau cyfreithwyr ar gyfer yr achos naw diwrnod o hyd heb gael eu hawlio eto, sy'n golygu y gall y ffigwr terfynol fod yn uwch.

Bydd munud o dawelwch yn cael ei gynnal ar safle'r ymosodiad ar ddydd Mawrth i nodi blwyddyn ers y digwyddiad.