Dyn yn y llys wedi'i gyhuddo o gynnau tân yn fwriadol

Mae un dyn yn dal ar goll yn dilyn y tân ym mis Gorffennaf

Mae dyn wedi ymddangos yn y llys yn dilyn tân difrifol yng ngwesty Tŷ Belgrave, Aberystwyth.

Fe ymddangosodd Damion Harris, 30 oed, gerbron Llys y Goron Abertawe ddydd Gwener wedi ei gyhuddo o gynnau tân yn fwriadol gyda'r bwriad o beryglu bywyd.

Digwyddodd y tân yn ystod oriau mân y bore ar 25 Gorffennaf.

Achubwyd 12 o bobl oedd yn yr adeilad yn ddiogel ond mae un dyn yn dal ar goll.

Cafodd Mr Harris ei gadw yn y ddalfa ac mae disgwyl iddo ymddangos gerbron llys eto ddiwedd mis Medi.