Hanner Marathon Caerdydd: Cyhoeddi enwau'r ddau fu farw

Roedd Ben McDonald (trydydd o'r chwith) yn rhedeg y ras am y tro cyntaf

Mae'r ddau redwr fu farw funudau ar ôl gorffen ras hanner marathon Caerdydd ddydd Sul wedi cael eu henwi.

Roedd Ben McDonald o Fro Morgannwg yn 25 oed ac roedd Dean Fletcher o Gaerwysg yn 32 oed.

Cafodd y Gwasanaeth Ambiwlans eu galw i drin un dyn am 12:18 brynhawn Sul, ac wedyn i drin yr ail ddyn 10 munud yn ddiweddarach.

Roedd y ddau wedi dioddef ataliad ar y galon.

Ar ôl iddyn nhw gael triniaeth brys yn y fan a'r lle, cafodd y ddau eu cludo i Ysbyty Athrofaol Cymru gerllaw, lle bu farw'r ddau yn ddiweddarach.

Mae trefnwyr y ras, Run 4 Wales, wedi disgrifio'r digwyddiad fel "trychineb" ac yn dweud eu bod yn cydymdeimlo gyda theuluoedd y dynion.

• Adolygu trefniadau hanner marathon wedi marwolaethau

• Hanner Marathon Caerdydd: Dau redwr wedi marw

Dywedodd Run 4 Wales hefyd eu bod nhw am adolygu trefniadau'r ras yn dilyn y marwolaethau.

Roedd Mr McDonald yn gweithio yng Nghanolfan Dŵr Gwyn Rhyngwladol Caerdydd, ac wedi cymhwyso fel athro.

Roedd yn rhedeg yr hanner marathon am y tro cyntaf, a hynny wrth ochr ei gariad, ei frodyr a'i chwiorydd-yng-nghyfraith.

Yn rhedeg am yr ail waith yn y ras, cafodd Mr Fletcher ei ddisgrifio gan ei deulu fel "gŵr a thad anhygoel".

Roedd wedi astudio ym Mhrifysgol Caerdydd, ac yno y cyfarfu â'i wraig.

Dean Fletcher, gyda'i wraig Katie a'u merch Evie cyn y ras ddydd Sul