Gwobr ysbrydoliaeth i'r 'mytholegol' Meic Stevens

Dywed trefnwyr mai Meic Stevens yw'r dewis perffaith i fod yn enillydd cyntaf y wobr ysbrydoliaeth

Meic Stevens fydd enillydd cyntaf gwobr sy'n cael ei chynnig am y tro cyntaf eleni fel rhan o seremoni flynyddol y Wobr Gerddoriaeth Gymreig.

Bydd yn derbyn y Wobr Ysbrydoliaeth Cerddoriaeth Gymreig fel cydnabyddiaeth o'i gyfraniad i'r maes yn ystod gyrfa sy'n ymestyn yn ôl i'r 1960au.

Dywedodd y cyflwynydd radio Huw Stephens - un o sylfaenwyr y gwobrau - fod y canwr o Solfach "wedi creu gymaint o gynnwrf dros y blynyddoedd, mae bron 'di troi yn ffigwr mytholegol".

Mae'r seremoni wobrwyo yn cael ei chynnal yng ngwesty'r Gyfnewidfa Lo yng Nghaerdydd ar 7 Tachwedd.

Mae'r canwr - sy'n cael ei ddisgrifio gan rai fel y Bob Dylan Cymreig - wedi cyhoeddi 27 albwm, gan gynnwys Outlander i label Warner Brothers yn y 60au.

Toreithiog a lliwgar

Dywed y trefnwyr y bydd y wobr ysbrydoliaeth yn nodi ei "gyfraniad aruthrol i gerddoriaeth Gymreig" a bod y canwr 76 oed "yn dal i ysbrydoli miloedd drwy ei berfformiadau a'u recordiau".

Dywedodd Huw Stephens: "Mae Meic wedi rhyddhau gymaint o albyms a 'di bod yn gymaint o unigolyn ar y sin. Mae pobol di-Gymraeg yn mwynhau ac yn caru ei gerddoriaeth e.

"Mae 'di bod mor doreithiog... y mwyafrif yn Gymraeg, a ni'n lwcus bod hi 'di ca'l e. Mae e 'di gweithio'n galed.... mae e wastad yn siarad dros gerddorion, ma'n gymeriad lliwgar.

Mae Meic Stevens wedi recordio a pherfformio yn y ddwy iaith ers degawdau

Ychwanegodd bod ei gasgliad helaeth o ganeuon yn "rhan o'n hanes ni" a bod y trefnwyr yn gobeithio y bydd y wobr ysbrydoliaeth yn cael ei rhoi yn flynyddol o hyn ymlaen.

Dywedodd Huw Stevens mai'r gantores Cerys Matthews yn wreiddiol oedd wedi awgrymu gwobrwyo Meic Stevens. ac wrth groesawu'r cyhoeddiad dywedodd hithau ei fod yn gyfansoddwr caneuon heb ei ail yn y ddwy iaith,

"Mae wedi dilyn ei lwybr ei hun, mae'n sgrifennu caneuon protest grymus a phrydferth, a chaneuon serch sy'n llorio," meddai. "Mae wedi bod yn ysbrydoliaeth gyson i gymaint ohonon ni ac wedi bod yn allweddol o ran llunio'r sîn gerddoriaeth Gymreig heddiw."

Albym newydd gorau'r flwyddyn

Mae'r Wobr Gerddoriaeth Gymreig yn cael ei chynnal am yr wythfed tro eleni.

Nod yr achlysur yw dathlu amrywiaeth cerddoriaeth newydd gan artistiaid a grwpiau o Gymru, ac mae'r enillydd yn cael ei ddewis gan banel o arbenigwyr o fewn y diwydiant.

Dyma'r 12 albwm sydd ar restr fer 2018:

• Alex Dingley - Beat the Babble

• Astroid Boys - Broke

• Boy Azooga - 1,2, Kung Fu

• Bryde - Like an Island

• Eugene Capper & Rhodri Brooks - Pontvane

• Catrin Finch & Seckou Keita - SOAR

• Gwenno - Le Kov

• Gruff Rhys - Babelsberg

• Manic Street Preachers - Resistance Is Futile

• MELLT - Mae'n Hawdd Pan Ti'n Ifanc

• Seazoo - Trunks

• Toby Hay - The Longest Day

The Gentle Good oedd enillydd y wobr y llynedd am yr albwm Ruins/Adfeilion.