Peilot Emiliano Sala wedi 'tynnu 'nôl o hyfforddiant'

Roedd Emiliano Sala ar yr awyren oedd yn cael ei hedfan gan y peilot, David Ibbotson

Roedd peilot yr awyren a ddiflannodd gydag ymosodwr Caerdydd, Emiliano Sala arni gydag amcanion i gael trwydded peilot fasnachol ond fe dynnodd 'nôl o'r hyfforddiant cyn diwedd y cwrs, yn ôl adroddiad.

Mae'r adroddiad cychwynnol gan Gangen Ymchwilio Damweiniau Awyr wedi datgelu nad oedd gan David Ibbotson drwydded peilot fasnachol.

Cafwyd hyd i gorff Sala yng ngweddillion yr awyren ar wely Môr Udd ar 6 Chwefror.

Nid yw corff Mr Ibbotson wedi'i ddarganfod hyd yma.

Yn ôl yr adroddiad, mae llyfr cofnodion Mr Ibbotson - sy'n cadw cofnod o'i holl hediadau - a'i drwydded wedi mynd ar goll yn dilyn y ddamwain.

'Rhannu'r gost'

Doedd Mr Ibbotson ddim yn gymwys i gludo teithwyr o fewn yr UE, os nad oedd hynny ar ffurf "rhannu'r gost" yn hytrach na'i fod yn cael ei dalu am hedfan.

Mae'r asiant pêl-droed, Willie McKay, wnaeth drefnu'r daith ar ran Sala, wedi dweud nad oedd hi'n daith ble roedd y gost wedi cael ei rhannu, gan godi cwestiynau os oedd hi'n hediad cyfreithlon.

Yr asiant pêl-droed, Willie McKay wnaeth drefnu'r daith i Emiliano Sala

Dywedodd Mr McKay wrth y BBC bod Sala "ddim yn talu unrhyw beth" a'i fod am dalu "beth bynnag oedd Dave [Henderson] yn ei godi".

Fe gadarnhaodd Mr McKay ei fod wedi trefnu hediad Sala i Gaerdydd drwy David Henderson - peilot profiadol oedd wedi ei hedfan ef a nifer o chwaraewyr eraill "ar hyd a lled Ewrop ar sawl achlysur".

Doedd Mr McKay ddim yn berchen ar yr awyren a dywedodd nad oedd yn ymwybodol pwy fyddai Mr Henderson yn gofyn i fod yn beilot ar gyfer yr hediad.

'Damwain drasig'

"Fe ddywedodd nad oedd yn gallu gwneud y daith, ond ei fod am gael rhywun arall. Roedd gen i ffydd yn David - doedd gen i ddim rheswm i beidio," meddai Mr McKay.

"Pan dy'ch chi'n ffonio tacsi dydych chi ddim yn gofyn iddo os oes ganddo drwydded yrru. Yr unig beth oedd ar fy meddwl i oedd cael y bachgen adref, a ry'n ni'n hapus gyda beth wnaethon ni.

"Rydw i wedi clywed ei fod yn beilot da iawn, ac mae'r ffaith fod pobl yn pardduo ei enw yn dilyn ei farwolaeth yn warth.

"Dydw i ddim yn meddwl bod unrhyw un yn gyfrifol. Damwain drasig oedd hi."

• CPD Caerdydd 'wedi cefnu' ar Sala

• Awyren Sala â 'difrod sylweddol'

• Miloedd yn angladd Emiliano Sala

Mae Mr Henderson wedi gwrthod cais gan BBC Cymru am ymateb.

Mae BBC Cymru wedi deall fod Mr Ibbotson wedi astudio am drwydded peilot fasnachol o fis Rhagfyr 2012 nes mis Gorffennaf 2014 drwy Ysgol Awyr Cranfield yn Luton, ond fe dynnodd yn ôl o'r cwrs cyn cymhwyso.

Dywedodd pennaeth hyfforddi'r ysgol, Dr Stuart E Smith fod Mr Ibbotson wedi dychwelyd yn 2016 gyda'r bwriad o barhau gyda'i hyfforddiant, ond ni wnaeth fwrw ymlaen â hynny.

Ychwanegodd ei fod wedi anfon adroddiad at yr Awdurdod Awyrennau Sifil (CAA) yn dilyn y ddamwain.

Roedd yr awyren Piper Malibu wedi'i chofrestru yn yr Unol Daleithiau

Roedd yr awyren Piper Malibu wedi'i chofrestru yn yr Unol Daleithiau, ble mae rheolau yn datgan fod defnyddio awyren y tu allan i'r wlad honno yn dibynnu ar ganiatâd gan y CAA yn gyntaf.

Doedd neb wedi gofyn caniatâd cyn taith Mr Ibbotson a Sala.

'Gadael i lawr'

Mae Martin Robinson, sy'n brif weithredwr Cymdeithas Perchnogion Awyrennau a Pheilotiaid wedi dweud fod y grŵp yn bryderus am y defnydd o awyrennau o dramor yn cael eu defnyddio ar gyfer gwaith tacsi yn yr awyr.

"Mae siarter awyr y DU yn talu arian mawr i'r llywodraeth ar gyfer Tystysgrifau Defnyddwyr Awyr. Heb y rhain does dim modd rhedeg hediadau tacsi na rhai masnachol," meddai.

"Cyfrifoldeb y person sy'n archebu'r hediad yw sicrhau fod peilot sy'n gymwys i hedfan wrth y llyw a sicrhau fod gan y peilot y profiad cyiwr o ran oriau hedfan.

"Ni fyddai Mr Sala fod wedi bod yn ymwybodol o drwydded David Ibbotson, ond fe ddylai'r person wnaeth archebu'r hediad.

"Maen nhw wedi gadael y dyn yma lawr."

Mae'r gwaith o chwilio am gorff Mr Ibbotson yn parhau.