Bocsiwr fu farw wedi celu cyflwr meddygol

Mike Towell cyn dechrau'r ornest

Bu farw bocsiwr o Dundee mewn gornest "na ddylai fyth fod wedi digwydd", yn ôl ymchwiliad i ddamwain angheuol.

Bu farw Mike Towell ddiwrnod ar ôl colli yn y bumed rownd yn erbyn Dale Evans o Gymru ym mis Medi 2016.

Daeth yr ymchwiliad i'r casgliad pe byddai wedi bod "yn agored a gonest" am gyflwr meddygol oedd ganddo, roedd hi'n "debygol iawn" na fyddai wedi cael parhau i ymladd ar ôl 2014.

Dywedodd yr ymchwiliad fod rheolau bocsio yn agored i bobl yn cuddio gwybodaeth berthnasol am ymladdwyr.

• Bocsiwr yn ymddeol 18 mis wedi trasiedi

• Marwolaeth Towell: Evans 'yn torri ei galon'

• Bocsiwr wedi marw ar ôl gornest

Dioddefodd Mike Towell waedu sylweddol ar ei ymennydd a chwyddo'r ymennydd wedi'r ornest yn Glasgow yn 2016.

Fe wnaeth Dale Evans o Gaerfyrddin ymddeol o'r gamp yn Chwefror y llynedd

Fe wnaeth Dale Evans ymddeol o'r gamp yn dilyn marwolaeth Towell gan ddweud fod y digwyddiad wedi "torri'i galon".

Dywedodd wrth BBC Cymru pan ymddeolodd yn Chwefror 2018 fod ei "awydd a phenderfyniad i lwyddo yn y gamp wedi mynd".

Cafodd Towell ei daro i'r llawr yn rownd gyntaf yr ornest yng ngwesty'r Radisson Blu yn Glasgow, ond fe lwyddodd i barhau â'r ornest.

Fe benderfynodd y dyfarnwr ddod â'r ornest i ben yn y bumed rownd wedi i'r Albanwr gael ei lorio am yr eilwaith. Cafodd driniaeth yn y ring cyn cael ocsigen ac yna cael ei gludo i ysbyty mewn ambiwlans.