Cannoedd o ddisgyblion yn protestio am newid hinsawdd

Mae ymgyrchwyr ifanc yn dweud eu bod yn fodlon "aberthu eu haddysg" er mwyn gorfodi gweithredu ar newid hinsawdd.

Mae cannoedd o ddisgyblion ysgolion ar draws Cymru wedi gadael y dosbarth yn mwyn bod yn rhan o Ddiwrnod Streic Hinsawdd y Byd.

Mae Llywodraeth Cymru wedi cyhoeddi argyfwng hinsawdd ac wedi gosod targedau uchelgeisiol am allyriadau carbon, ond mae protestwyr yn galw am fwy.

Dywedodd un o'r protestwyr yng Nghaerdydd, Beth Irving: "Pe byddai gen i ddewis arall, fyddwn i ddim yn 'chwarae mig' fel mae rhai pobl yn ei alw fo.

Mae un o'r protestiadau yn cael eu cynnal yn Aberystwyth

Rhai o'r protestwyr ym Mhrifysgol Bangor cyn gorymdaith i ganol y ddinas

"Fodlon aberthu ein haddysg"

"Mae pobl yn dechrau gwrando arnom ni am ein bod ni'n herio'r system.

"Ry'n ni'n fodlon aberthu ein haddysg er mwyn cael pobl i siarad am hyn a gweithredu."

Protestwyr yng nghanol Caerfyrddin

Dechreuodd protestiadau Cymru yn Nhywyn, Gwynedd, fore Gwener cyn lledu i Drefynwy. Bellach mae protestiadau mewn 11 o lefydd ar draws y wlad gyda mwy i ddilyn yn y prynhawn.

Mae protestiadau Rhwydwaith Hinsawdd Myfyrwyr y DU yn cael eu cynnal yn Abertawe, Wrecsam, Aberhonddu, Bangor a llefydd eraill.

Mae staff a myfyrwyr Coleg y Cymoedd wedi cefnogi'r ymgyrch yn holl gampysau'r sefydliad - yn Ystrad Mynach, Aberdâr, Rhondda a Nantgarw.

Dywedodd y pennaeth, Karen Phillips, ei fod yn bwysig "i gefnogi ein dysgwyr", ac fel rhan o'r "ymroddiad fel corff i fynd i'r afael â heriau cynhesu byd-eang" fe fydd y coleg yn "herio dysgwyr a staff i fabwysiadu ymarferion mwy gwyrdd".

Mae hyd at 500 o bobl wedi cymryd rhan yn y brotest yn Aberystwyth

Mae Comisiynydd Cenedlaethau'r Dyfodol, Sophie Howe, yn cytuno gyda'r myfyrwyr, gan ddweud nad yw'r wlad "yn gweithredu ar y raddfa na'r cyflymder sydd angen".

"Mae effaith newid hinsawdd eisoes yn amlwg yng Nghymru gyda 23% o'n harfordir yn erydu oherwydd bod lefel y môr yn codi, a'r risg o golli un o bob 14 o'n rhywogaethau bywyd gwyllt," meddai.

"Ac eto, y genhedlaeth ifanc sy'n arwain y ddadl ac yn dal y llywodraethau i gyfrif am beidio gweithredu ar newid hinsawdd."

Rhieni'n ymuno gyda phlant yn Nhrefynwy