Gorchymyn Caerdydd i dalu £5.3m am Emiliano Sala

Mae'r corff rheoli pêl-droed, FIFA, wedi gorchymyn Caerdydd i dalu £5.3m (€6m) i Nantes am drosglwyddiad y diweddar chwaraewr, Emiliano Sala.

Mae'r clybiau wedi bod yn dadlau dros y taliad ers marwolaeth yr Archentwr mewn damwain awyren ym mis Ionawr.

Bu farw'r ymosodwr, 28, wrth deithio o Ffrainc i ymuno â'i glwb newydd.

Roedd Caerdydd wedi dadlau na ddylen nhw dalu'r ffi o £15m gan nad oedd Sala yn chwaraewr Caerdydd yn swyddogol pan fu farw.

Mae'r clwb yn dweud y bydd yn "chwilio am eglurder pellach gan FIFA" wedi'r cyhoeddiad.

• Ymestyn amser Caerdydd i dalu am Sala

• Delweddau Sala: Carcharu dau berson

Cafodd Sala ei gyhoeddi fel chwaraewr newydd Caerdydd ym mis Ionawr.

Roedd yn teithio i Gaerdydd pan blymiodd yr awyren Piper Malibu yr oedd yn teithio ynddi i Fôr Udd ar 21 Ionawr.

Cafodd ei gorff ei ganfod ym mis Chwefror ond dydy'r peilot, David Ibbotson, 59 o Sir Lincoln, erioed wedi ei ddarganfod.

Emiliano Sala oedd yr unig deithiwr ar yr awyren oedd yn cael ei hedfan gan David Ibbotson

Fe wnaeth Nantes yrru llythyr at Uwch Gynghrair Lloegr ar 5 Chwefror yn hawlio'r cyntaf o dri thaliad o fewn 10 diwrnod.

Roedd yr Adar Gleision yn dadlau nad oedd y trosglwyddiad wedi ei gwblhau gan nad oedd Sala wedi arwyddo cytundeb oedd wedi'i adolygu, ac felly nad oedd wedi ei gofrestru gyda'r Uwch Gynghrair.

Roedd rhaid i banel FIFA benderfynu ar y mater ar ôl i'r clybiau fethu a dod i gytundeb.

Y ffi am Sala oedd yr uchaf erioed i Glwb Pêl-droed Caerdydd ei gytuno am chwaraewr, ac mae'r swm o £5.3m yn cyfateb i'r rhandal cyntaf o'r ffi llawn.

'Cydnabod y penderfyniad'

Dywedodd llefarydd ar ran FIFA bod y swm yn cyfateb i'r "rhandaliad cyntaf sy'n ddyledus yn unol â'r cytundeb".

"Am resymau cyfrinachedd, ni allwn wneud sylw pellach ar hyn o bryd ar randaliadau posib yn y dyfodol nac amodau eraill y cytundeb."

Mewn datganiad, dywedodd CPD Caerdydd bod y clwb yn "cydnabod y penderfyniad a gyhoeddwyd" gan FIFA, ond y byddai'n "chwilio am eglurder pellach gan FIFA ar union ystyr y datganiad er mwyn gwneud penderfyniad deallus am ein camau nesaf".

Mewn datganiad, dywedodd cyfreithwyr Nantes bod y clwb yn croesawu'r penderfyniad.

"Mae'n rhaid i Gaerdydd barchu eu hymrwymiad a chyfreithiau chwaraeon," meddai Jerôme Marsaudon a Louis-Marie Absil.

Ychwanegodd y datganiad bod "FIFA wedi atgoffa... am yr ymrwymiadau sy'n cael eu gwneud gan glybiau yng nghyd-destun trosglwyddiadau chwaraewyr sy'n rhaid eu parchu".