Dim achos o ddynladdiad wedi marwolaeth Emiliano Sala

Clywodd cwest i farwolaeth Emiliano Sala ei fod wedi marw o anafiadau i'w ben a'i gorff

Mae dyn gafodd ei arestio ar amheuaeth o ddynladdiad yn achos marwolaeth Emiliano Sala wedi ei ryddhau heb gyhuddiad.

Fe gafodd y pêl-droediwr ei ladd mewn damwain awyren ynghyd â'r peilot David Ibbotson, ddeuddydd ar ôl i'r pêl-droediwr arwyddo i dîm Caerdydd yn Ionawr 2019.

Ym mis Mehefin y llynedd, cyhoeddodd Heddlu Dorset eu bod wedi arestio dyn 64 oed o ogledd Sir Efrog.

Dywed yr heddlu ddydd Mercher na fyddan nhw'n gofyn i'r Gwasanaeth Erlyn fwrw 'mlaen gyda chyhuddiadau yn erbyn y dyn.

• Nantes yn hawlio arian am Emiliano Sala

• Sala: 'Lefel uchel o garbon monocsid'

"Rydym wedi cynnal archwiliad manwl i amgylchiadau marwolaeth Mr Sala, ac mae hwn wedi bod yn ymchwiliad cymhleth, gan archwilio tystiolaeth helaeth ar y cyd gyda nifer o sefydliadau," meddai'r ditectif arolygydd Simon Huxter o Heddlu Dorset.

"Mae ymchwiliad yn parhau i amgylchiadau'r daith awyren ac felly byddai'n amhriodol i wneud sylw pellach."

Mae disgwyl i adroddiad terfynol i achos y ddamwain gael ei gyhoeddi ddydd Gwener gan gangen Ymchwilio i Ddamweiniau Awyr.

Roedd Sala, 28, yn teithio o Nantes i Gaerdydd ar 21 Ionawr 2019 pan blymiodd yr awyren i'r môr.