Dim erlyniad yn achos marwolaeth Christopher Kapessa

Cafwyd hyn i gorff Christopher Kapessa mewn afon ar 1 Gorffennaf 2019

Ni fydd bachgen 14 oed oedd wedi gwthio bachgen arall i afon cyn iddo farw yn cael ei erlyn, meddai Gwasanaeth Erlyn y Goron.

Cafodd corff Christopher Kapessa, 13, ei ddarganfod yn Afon Cynon ger Aberpennar, Rhondda Cynon Taf ar 1 Gorffennaf 2019.

Dywedodd Gwasanaeth Erlyn y Goron ei fod wedi cael ei wthio i'r afon mewn gweithred ffôl.

Roedd teulu Christopher wedi cyhuddo Gwasanaeth Erlyn y Goron o ystyried "bywyd plentyn du yn rhatach na'r budd cyhoeddus i'r plentyn dan amheuaeth".

Y rhan yma o Afon Cynon oedd canolbwynt ymchwiliad yr heddlu

Mae Gwasanaeth Erlyn y Goron wedi dweud nad oes "budd cyhoeddus" mewn erlyn ar sail dyn-laddiad. Cafodd penderfyniad blaenorol i beidio erlyn ei adolygu, gan bod digon o dystiolaeth.

Dywedodd Jenny Hopkins, sydd yn gyfrifol am oruchwylio uned apeliadau ac adolygiadau'r gwasanaeth Erlyn y Goron: "Er fod tystiolaeth i gefnogi erlyniad ar sail dyn-laddiad nid oedd o fudd cyhoeddus i erlyn.

"Fe ddigwyddodd marwolaeth drasig Christopher wedi i grŵp o blant fynd i gael hwyl ger yr afon.

"Dangosodd y dystiolaeth fod Christopher wedi ei wthio i'r afon wrth chwarae'n ffôl, gyda dim awgrym fod y plentyn arall gyda bwriad i'w niweidio, er mai dyna oedd y canlyniad ofnadwy."

'Oedran a chefndir'

Ychwanegodd eu bod wedi ystyried oed ifanc y plentyn dan amheuaeth, ei ddiffyg cefndir troseddol a'i gymeriad da.

Dywedodd: "Rydym yn sylweddoli y bydd ein penderfyniad yn achosi loes i'r teulu fydd efallai yn teimlo fod bywyd y plentyn oedd yn cael ei amau yn cael blaenoriaeth dros fywyd Christopher.

"Rydym wedi defnyddio ein prawf cyfreithiol i'r dystiolaeth ac rwyf yn gobeithio y gallan nhw ddeall pam ein bod wedi dod i'r casgliad yma."

Fe ddywedodd y gwasanaeth hefyd nad oedd yr un o ddatganiadau'r bobl ifanc fu'n dystion i'r digwyddiad yn awgrymu bod hiliaeth yn rhan o'r hyn ddigwyddodd o gwbl.

Daeth Gwasanaeth Erlyn y Goron i'r casgliad nad oedd budd cyhoeddus mewn cynnal erlyniad

Dywedodd mam Christopher, Alina Joseph: "Mae penderfyniad Gwasanaeth Erlyn i Goron i beidio erlyn y rhai oedd yn gyfrifol am farwolaeth fy mab yn groes i egwyddorion cydraddoldeb a chyfiawnder mae llawer o ymgyrchwyr wedi brwydro i'w dileu am flynyddoedd lawer.

"Rwyf yn parhau i obeithio am gyfiawnder ond mae'n ymddangos fod rhaid i mi ymladd amdano ar bob cam a thro."

Siom teulu Christopher

Disgrifiodd Ymgyrch Cyfiawnder i Deulu Christopher Kapessa benderfyniad yr adolygiad fel un "groes i'r graen" a "nid yn unig yn anghyfiawnder difrifol o gofio am ffeithiau'r achos ond yn cynrychioli carreg filltir damniol i asiantaethau cyfiawnder troseddol yng Nghymru a gweddill y Deyrnas Unedig".

Ychwanegodd: "Fe wnaeth ystyried bywyd plentyn du yn rhatach na'r budd cyhoeddus i'r bachgen dan amheuaeth."

Dywedodd fod Ms Joseph yn ystyried dechrau adolygiad barnwrol i herio penderfyniad Gwasanaeth Erlyn y Goron a galw am ymyrraeth bersonol y Gweinidog Cyfiawnder drwy ei haelod seneddol.

'Anfon neges'

Dywedodd cyfreithiwr Ms Joseph, Hilary Brown fod y penderfyniad yn "anfon neges nad oedd ei fywyd o bwys".

Ychwanegodd: "Ni wnaeth Christopher golli ei fywyd o ganlyniad i ddamwain neu o achos ei weithredoedd ei hun. Cafodd ei wthio i'w farwolaeth gan rhywun ac fe ddylai'r system gyfiawnder droseddol yn y DU gymryd camau i sicrhau fod cyfiawnder yn cael ei roi i Christopher a'i deulu.

"Wedi astudio adolygiad Gwasanaeth Erlyn y Goron rydym nawr yn y broses o ystyried ein holl ddewisiadau cyfreithiol."