'Darlun llwm' i bobl ifanc ar brentisiaethau

Mae pryder am brentisiaid sy'n dal ar y cynllun ffyrlo

Yn ôl ffigyrau diweddaraf Llywodraeth Cymru, mae nifer y prentisiaid sydd wedi cael eu gwneud yn ddi-waith wedi bron dyblu mewn mis.

Mae'r ystadegau'n dangos fod y nifer wedi codi o 50 i 95 yn y mis hyd at 25 Medi.

Bellach mae pryderon am 3,000 o brentisiaid sydd ar y cynllun ffyrlo, sy'n dod i ben ar 31 Hydref.

Pobl ifanc sydd wedi diodde' fwyaf.

Dywedodd Barry Walters o'r elusen addysgiadol Colegau Cymru: "Mae'r ffigwr yn paentio darlun llwm i'r sector addysg galwedigaethol yng Nghymru, ac un sy'n debyg o waethygu ar ddiwedd mis Hydref.

"Mae darparwyr yn gweithio'n ddiflino i ganfod gwaith arall i ddysgwyr sydd naill ai ar ffyrlo neu wedi eu gwneud yn ddi-waith."

Roedd Rena Platt yn gweithio fel prentis gyda chwmni gofal plant ei mam pan fu'n rhaid cau'r busnes oherwydd coronafeirws.

Bu'n brentis yn Mother's Little Helper yn Y Fenni am ddeufis pan gafodd ei rhoi ar ffyrlo oherwydd y feirws.

Ond yna bu'n rhaid i'r busnes gau yn gyfan gwbl.

Roedd Rena Platt yn gweithio fel prentis gyda busnes gofal plant ei mam, Mother's Little Helper, cyn i'r busnes orfod cau oherwydd Covid

Dywedodd Rena: "Caeodd y busnes yn barhaol ym is Gorffennaf ac roedd rhaid i fi fynd ar Gredyd Cynhwysol.

"Roedd mam yn agored iawn am y peth, ond oherwydd amgylchiadau doedd dim dewis ond cau."

Fe fyddai'r brentisiaeth wedi galluogi Rena i gael cymhwysiad gofal plant lefel 2.

Mae hi bellach yn chwilio am fwy o waith yn y maes er mwyn parhau gyda hynny.

Mae darparwyr hyfforddiant Educ8 yn Hengoed wedi bod yn ei chynorthwyo yn y cyfamser.

Dywedodd prif weithredwr Gyrfa Cymru, Nikki Lawrence, ei fod yn gyfnod "hynod anodd ac ansicr" i gyflogwyr a phrentisiaid, a bod effaith y pandemig yn golygu mai "diswyddo yw'r unig opsiwn" i rai cyflogwyr.

"Mae ein tîm Cymru'n Gweithio yn gallu darparu cefnogaeth un-i-un i unigolion sydd wedi cael eu diswyddo o'u prentisiaethau," meddai.

Mae'r gefnogaeth yna'n cynnwys cyfleoedd i gwblhau eu hyfforddiant neu gefnogaeth ariannol arall.

Ychwanegodd y gall y gefnogaeth gael ei chynnig o flaen llaw os fyddai diswyddiadau'n gallu cael eu rhagweld.

Dywedodd prif weithredwr Gyrfa Cymru, Nikki Lawrence ei fod yn "gyfnod anodd ac ansicr" i brentisiaid a chyflogwyr

Yn ôl cyfarwyddwr Ffederasiwn Hyfforddiant Cenedlaethol Cymru, Jeff Protheroe, mae'n bryderus bod bron 3,000 o brentisiaid yn parhau ar ffyrlo.

"Fel ry'n ni'n gwybod mae hynny'n dod i ben ar ddiwedd Hydref," meddai.

"Ry'n ni eisoes wedi gweld nifer o ddiswyddiadau yn digwydd, a'r pryder nawr yw beth sydd i ddod?

"Oni bai fod yna lacio rhywfaint mewn rhai diwydiannau, yn enwedig manwerthu a thwristiaeth, ry'n ni'n debyg o weld mwy o ddiswyddiadau."

Dywedodd Llywodraeth Cymru ei bod ar y trywydd iawn i gyrraedd eu nod o greu 100,000 o brentisiaethau yn nhymor y llywodraeth yma.

"Bydd ein cyhoeddiad diweddar o £40m i swyddi a sgiliau yn hanfodol i annog cyflogwyr i recriwtio a chadw hyd at 5,000 o brentisiaid," dywedodd llefarydd.

"Er bod y pandemig yn her i bawb, ry'n ni'n parhau i weithio'n agos gyda'n partneriaid i wireddu ein huchelgais."