Beth i'w wylio yn ystod cyfnod clo 2.0?
- Cyhoeddwyd
Ydyn, rydyn ni'n ôl mewn cyfnod clo - ond peidiwch â phoeni, mae yna ddigon o bethau ar S4C Clic, dolen allanol i'n diddanu pan ydyn ni'n sownd yn y tŷ.
Un Bore Mercher - cyfresi 1 a 2
Un Bore Mercher
Gyda chyfres 3 yn dechrau ar S4C ar 1 Tachwedd, dyma gyfle i ddal i fyny neu ail fwynhau anturiaethau Faith a'i bywyd cymhleth.
Ble mae Evan? Pam mae wedi mynd? Mae'r atebion i gyd ar gael i chi!
Talcen Caled - cyfresi 1, 2 a 3
Talcen Caled
I'r rhai ohonoch chi sydd eisiau ychydig o nostaljia (a Bryn Fôn), mae penodau cyntaf y gyfres boblogaidd o ddechrau'r 2000au ar gael i chi. Mwynhewch wylio'r holl strach a threialon gall fywyd ei daflu at Les a Gloria rhif 8.
Ac unwaith i chi orffen rheiny, peidiwch â phoeni, bydd cyfres 4 a 5 yn dilyn yn ystod yr wythnosau nesaf.
Ffilmiau Arswyd
Yn arbennig ar gyfer Calan Gaeaf tair ffilm i godi ofn a gwên!
Mae O'r Ddaear Hen yn cael ei grybwyll yn aml gan bobl wnaeth ei weld yn blentyn ac yn taeru iddo gael effaith ysgytwol arnyn nhw. Am beth mae'r ffws i gyd?
O'r Ddaear Hen
Nesaf mae Tylluan Wen... Wel, wnewch chi fyth edrych ar y gantores Siân James yr un fath eto wedi gweld hwn!
Ac yn olaf, os ydych chi erioed wedi teimlo'r awydd i weld ffilm sydd yn cynnwys Dafydd Iwan yn noeth, wedi'i baentio'n wyrdd ac yn gorwedd mewn ffos, yna Gwaed ar y Sêr yw'r ffilm i chi. (Mae hefyd yn cynnwys y car heddlu lleiaf realistig yn y byd.)
Gwaed ar y Sêr
Dihirod Dyfed
Dihirod Dyfed
Dim ond mis sydd gyda chi ar ôl i wylio rhai o droseddau gwaethaf gorllewin Cymru'n cael eu dramateiddio... hanesion John Cloff a Ronnie Cadno ac ambell i un arall anffodus.
Cyfresi'r cyfnod clo cyntaf
Sgwrs Dan y Sêr
Mae hefyd cyfle i fwynhau holl benodau Sgwrs Dan y Sêr, i goginio o Gwpwrdd Epic Chris neu addasu eich cwt cornel gyda chymorth tîm Lle Bach Mawr.
Hefyd o ddiddordeb: