'Sa i'n hoffi'r tag influencer ond ma' pobl yn gwrando'

Ar 11 Mawrth 2020, gyda phandemig Covid-19 yn dechrau cydio, fe gyhoeddodd disgybl ysgol dabl ar Twitter yn dangos faint o achosion oedd bellach wedi'u cadarnhau yng Nghymru.

Union flwyddyn yn ddiweddarach mae Lloyd Warburton, 17, yn dal i gyhoeddi'r ystadegau - y gwahaniaeth mawr yw bod ei gynulleidfa bellach wedi chwyddo i 22,000 o ddilynwyr.

Yn ei eiriau ei hun dim ond "bachgen yn eistedd ar bwys cyfrifiadur", â mynediad i'r un ffynonellau o wybodaeth â'r rhan fwyaf o bobl, yw'r bachgen o Aberystwyth.

Ond ers hynny mae cydnabyddiaeth o'i waith wedi dod o bob cwr, gan gynnwys canmoliaeth gan ei Aelod o'r Senedd, Elin Jones, a gwobr ar raglen S4C.

'Pobl eisiau pethau syml'

Yn ôl Lloyd, roedd ganddo wastad ddiddordeb mewn ystadegau a phan ddechreuodd y pandemig y llynedd fe benderfynodd y byddai'n rhoi cynnig ar gyflwyno rhywfaint o'r wybodaeth ar ffurf tablau.

Chafodd o ddim llawer o ymateb i ddechrau, ond ar ôl rhyw wythnos "roedd pobl wedi dechrau rhannu nhw mwy a mwy", ac erbyn dechrau'r cyfnod clo cyntaf "roedd pethau bron wedi ffrwydro".

"Roedd tua 2,000 o bobl wedi dilyn yn wythnos cyntaf lockdown," meddai.

"Roeddwn i'n disgwyl ym mis Mawrth byddai'n mynd 'mlaen am ddau neu dri mis, ond na, roeddwn i'n anghywir!"

Roedd Lloyd yn cyhoeddi ei ystadegau Covid-19 tra hefyd yn astudio ar gyfer ei bynciau TGAU

Wrth i Covid-19 ddod yn rhan ganolog o fywyd pob dydd pobl, roedd mwy a mwy o bobl yn troi at gyfrif Twitter Lloyd i weld beth oedd y sefyllfa ddiweddaraf.

"Mae pobl eisiau pethau syml ar y we," meddai Lloyd, wrth drafod beth mae'n credu oedd apêl ei ystadegau ar y cyfryngau cymdeithasol.

"Dydy pobl ddim eisiau clicio ar linc i Iechyd Cyhoeddus Cymru, wedyn mynd drwy'r dangosfwrdd ac wedyn gorfod edrych drwy fapiau a graffiau jyst i weld un peth

"Felly roedd rhoi popeth mewn i un slide mewn fformat syml iawn yn rhywbeth sy'n apelio at bron pawb sy'n defnyddio Twitter.

"Mae faint mae wedi tyfu... yn dangos bod yna le i rywun ifanc sy'n gallu rhoi pethau mewn ffordd syml iawn fel bod pobl jyst yn gallu edrych a rhannu."

Dylanwad ar y we

Gyda'r miloedd o ddilynwyr newydd daeth sylw a phroffil ychwanegol i'w gyfrif hefyd, rhywbeth mae Lloyd yn cyfaddef sydd wedi cymryd amser i ddod i arfer ag o.

"Sa'i really yn hoffi'r tag 'influencer'," meddai.

"Ond mae'r pethau fi'n dweud yn mynd mewn i bennau pobl, ac mae pobl yn gwrando arna'i, a weithiau sa'i yn sylweddoli hynna.

"Dwi'n dweud rhywbeth ac mae lot o bobl yn hoffi fe a fi'n meddwl 'oh, mae lot o bobl yn gwrando arna'i, falle fi'n gallu newid pethau'."

Mae Lloyd yn dweud fod ei deulu'n falch o'r gwaith mae'n ei wneud

Mae'n ceisio cadw'i fywyd Twitter a'i fywyd go iawn ar wahân, meddai, ac yn mwynhau'r cyfleoedd i fynd am dro pan mae'n gallu er mwyn dianc i ffwrdd o'r sgrin weithiau.

"Fi'n trio peidio siarad amdano fe gyda fy ffrindiau, oherwydd fi'n gwybod falle ar ôl cwpl o wythnosau byddan nhw'n mynd 'shut up Lloyd!'," meddai gyda gwên.

"Ond sa'i wedi newid fel person gyda fy ffrindiau a dwi'n credu bod fy nheulu i'n eitha' balch."

Lloyd Warburton gyda'i wobr 'Dathlu Dewrder'

Roedd y balchder yna ar ei amlycaf pan gafodd Lloyd y "fraint enfawr" o wobr gan raglen 'Dathlu Dewrder' ar S4C cyn y Nadolig, am ei waith gyda'i ystadegau a'i wefan.

"Nes i wylio'r sioe ar y noson ac roedd pobl eraill ar y sioe wedi creu masgiau a gweithio mewn ysbytai, ac roedd tamed bach o feddwl gen i bod nhw wedi 'neud lot yn fwy na fi," meddai.

"[Ond] fi'n credu bod faint o sylw mae hwn wedi cael, a'r wobr, yn dangos roedd yna le i fi yn y gymdeithas Gymraeg i roi ystadegau lan ar Twitter a bod pobl yn mynd i edrych arnyn nhw."