Rhaglen deledu wedi cyflymu adferiad Castell Gwrych

Cafodd y castell, ger Abergele, ei adeiladu ar ddechrau'r 19eg ganrif

Mae'r broses o adfer y castell a gafodd ei ddefnyddio yng nghyfres y llynedd o I'm a Celebrity Get Me Out of Here! wedi symud yn gynt na'r disgwyl ar ôl ymddangos ar y sioe.

Fe wnaeth Castell Gwrych, ger Abergele, Conwy, ddisodli cartref arferol y gyfres yn jyngl Awstralia fis Tachwedd a Rhagfyr diwethaf yn sgil y pandemig.

Mae'r castell wedi ailagor i'r cyhoedd am y tro cyntaf ers i'r sioe gael ei darlledu, gyda gwaith adfer ychwanegol wedi'i wneud.

Dywedodd pennaeth ymddiriedolaeth y castell fod y gwaith bellach ddwy flynedd yn gynt na'r disgwyl.

Roedd Kiosk Cledwyn yn 'gymeriad' blaenllaw yng nghyfres y llynedd

Mae ciosg Cledwyn nawr ar agor i'r cyhoedd

Ers i'r castell ailagor, mae ymwelwyr yn gallu mynd i weld rhannau o'r adeilad a oedd ar set y sioe. Mae'r rhain yn cynnwys toiledau awyr agored yr enwogion a'r ciosg lle roeddent yn casglu danteithion dyddiol a enillwyd mewn heriau amrywiol.

Roedd Castell Gwrych ar agor fel atyniad i ymwelwyr tan yr 1980au ond, ers hynny, er gwaethaf ymdrechion sawl perchennog daeth yn adfail heb do na lloriau.

Llwyddodd Ymddiriedolaeth Cadwraeth Castell Gwrych i brynu'r adeilad o'r diwedd yn 2018, ac mae wedi bod yn gweithio'n galed i'w sefydlogi ers hynny.

'Cyflymodd y sioe y broses adfer yn fawr'

Dywedodd Dr Mark Baker, cadeirydd yr ymddiriedolaeth: "Cyflymodd y sioe y broses adfer yn fawr.

"Roedd gennym bopeth yn ei le - cyngor arbenigol a chontractwyr arbenigol - ac roeddem ar fin dechrau casglu arian at ei gilydd i gyflawni'r gwaith.

"Ond fe dalodd ITV am waith adfer mawr ar bethau fel topiau waliau a linteli ffenestri. Rydyn ni nawr tua dwy flynedd o flaen y lle roedden ni'n bwriadu bod.

"Mae'n golygu, yn weddol fuan, y gallwn agor y tu mewn i adeilad y castell ei hun am y tro cyntaf, gan gynnwys y grisiau marmor enwog - y rheiny oedd yr enwogion yn aml yn cerdded i fyny ac i lawr. Mae wedi bod yn rhy beryglus hyd yn hyn."

Mae'r castell wedi dewis cadw rhai o setiau'r sioe

Mae gobaith hefyd y bydd yr orsedd a gafodd ei defnyddio i goroni'r cyflwynydd Giovanna Fletcher fel enillydd y gyfres yn cael ei harddangos pan fydd ymwelwyr yn cael eu caniatáu y tu mewn i'r castell.

'Diddordeb wedi saethu i fyny'

Dywedodd Thomas Rye, sy'n gweithio yn y castell, fod ymwelwyr wedi bod yn dod o bob rhan o Gymru a Lloegr ers i gyfyngiadau coronafeirws lacio ddydd Llun.

"Nid oeddem yn siŵr sut brofiad fyddai bod ar agor eto, ond mae'r ymateb gan ymwelwyr wedi bod yn hynod gadarnhaol.

"Mae pobl yn dal i ddweud pa mor anhygoel ydyw. Cyn gynted ag y bydd ceir yn cyrraedd y giât, gallwch weld y cyffro ar wynebau plant.

"Roedd y genedl yn gwylio Gwrych y llynedd ac ers hynny, mae diddordeb wedi saethu i fyny.

"Yn ogystal ag ymwelwyr, rydyn ni wedi cael 100 o bobl yn e-bostio am wirfoddoli yma. Mae wedi bod yn wych gweld y gymuned yn cymryd rhan yn y castell."