71 achos newydd o Covid-19 wedi eu cofnodi

Mae dros ddwy filiwn o bobl yng Nghymru bellach wedi derbyn o leiaf un dos o'r brechlyn

Mae 71 o achosion newydd o Covid-19 wedi eu cofnodi dros y 24 awr ddiweddaraf, yn ôl Iechyd Cyhoeddus Cymru.

Conwy sy'n parhau i fod â'r gyfradd uchaf o achosion i bob 100,000 o'r boblogaeth dros saith diwrnod, sef 23.

Mae trigolion y sir yn cael eu hannog i fynd am brawf Covid mor fuan â phosib, hyd yn oed os nad ydyn nhw'n dangos symptomau.

Mae hynny'n wir hefyd yn ardal Porthmadog, lle mae dau achos wedi'u cadarnhau o amrywiolyn Delta.

Ni chafodd yr un farwolaeth ychwanegol ei chofnodi dros yr un cyfnod hyd at 09:00 ar 3 Mehefin.

Cyfradd yn gostwng

Mae'n golygu bod cyfanswm y marwolaethau'n aros ar 5,569, a nifer yr achosion wedi codi i 212,999.

Mae 2,169,624 o bobl bellach wedi cael y dos cyntaf o'r brechlyn, a 1,181,259 wedi cael dau ddos.

Bellach mae'r cyfradd achosion i bob 100,000 o'r boblogaeth dros saith diwrnod wedi codi i 7.96 o 7.52 ddydd Iau.

Yn ogystal â Chonwy, y siroedd eraill sydd â chyfradd yn y ffigyrau dwbl yw Wrecsam a Sir Ddinbych (12.5), Castell-Nedd Port Talbot (11.2), a Chaerdydd (10.4).

Y siroedd gyda'r cyfraddau isaf ydy Ynys Môn (1.4) a Merthyr Tydfil (1.7).