Achos gwrthdrawiad a laddodd mam a merch yn 'aneglur'

Bu farw Nancy Roberts ac Anwen Mitchelmore yn syth wedi'r gwrthdrawiad

Mae cwest wedi clywed bod hi'n dal yn aneglur pam y gwyrodd cerbyd ar draws ffordd yng Ngwynedd haf diwethaf gan wrthdaro gyda lori a lladd mam a merch o Borthmadog.

Bu farw Anwen Mitchelmore, 59, a'i mam 84 oed, Nancy Roberts wedi i VW Polo Mrs Mitchelmore groesi i lôn anghywir yr A547 yn ardal Garndolbenmaen tua 15:30 ar 15 Gorffennaf y llynedd.

Cofnododd y crwner gasgliad bod y ddwy wedi marw o ganlyniad i wrthdrawiad ffordd.

Clywodd y gwrandawiad bod y ddwy'n teithio tua'r de ar ôl ymweld â pherthnasau yn Nyffryn Nantlle a bod lori nwyddau DAF, oedd yn teithio i gyfeiriad Caernarfon, newydd yrru heibio tractor gyda threlar cyn y gwrthdrawiad.

Dangosodd luniau dash cam cerbyd arall bod y symudiad hwnnw heb chwarae unrhyw ran yn y gwrthdrawiad.

'Modd osgoi'r gwrthdrawiad yma'

Dywedodd yr archwiliwr gwrthdrawiadau Gordon Saynor wrth y cwest: "Ni allaf egluro pam y croesodd Ms Mitchelmore i'r lôn wrthwynebol.

"Fy marn ar ôl ystyried yw bod modd osgoi'r gwrthdrawiad yma."

Y gwasanaethau brys yn ymateb wedi'r gwrthdrawiad ar yr A487 fis Gorffennaf y llynedd

Dywedodd ei fod yn diystyru ffactorau amgylcheddol neu namau cerbyd blaenorol fel rhesymau posib.

Er bod y lori'n teithio fymryn yn gyflymach nag y dylai ar ffordd A yn ôl data'r tacograff, dywedodd Mr Saynor na allai "ystyried hynny'n berthnasol".

Cadarnhawyd yn y fan a'r lle bod Ms Roberts a Ms Mitchelmore yn farw, ac fe glywodd y cwest bod "dim tystiolaeth o lewyg meddygol" allai fod wedi achosi i Ms Mitchelmore golli rheolaeth ar ei char.

Bu farw o anafiadau niferus a bu farw Ms Roberts o ganlyniad trawma i'r bron a'r abdomen.

'Gyrrwr diogel'

Mewn datganiad i'r gwrandawiad, dywedodd merch Ms Mitchelmore, Kiri Ann Mitchelmore, bod ei mam wedi dysgu gyrru wedi ei phen-blwydd yn 50, gan gael gwersi heb yn wybod i'r teulu.

Dywedodd bod ei mam yn yrrwr "diogel" gyda thrwydded yrru lan, a'i bod yn glynu'n gyson i gyfyngiadau cyflymder.

• Englyn i fam a merch a fu farw mewn gwrthdrawiad

Dywedodd Uwch Grwner Dros Dro Gogledd Orllewin Cymru, Katie Sutherland, na allai diystyru'r posibilrwydd bod y gwrthdrawiad yn ganlyniad gweithred fwriadol gan Mrs Mitchelmore.

Ond dywedodd bod "dim tystiolaeth o gwbl taw dyna'r achos ac rwy'n cael hynny'n annhebygol iawn".

Cydymdeimlodd gyda'r teulu am golli dau berthynas yn y fath fodd.