Beicwyr dŵr: 'Rhai unigolion sy'n rhoi enw drwg'

Mae defnyddwyr beiciau dŵr yn galw ar bobl i beidio eu beirniadu nhw i gyd ar sail ymddygiad rhai unigolion.

Mae'r heddlu wedi rhybuddio y gallan nhw erlyn ar ôl adroddiadau ar gyfryngau cymdeithasol bod rhai wedi eu gweld yn amharu ar heidiau o adar môr mewn mannau sensitif yn y gogledd.

Ond yn ôl un sy'n defnyddio beic dŵr, mae clywed am ymddygiad o'r fath yn gwneud i'r mwyafrif o ddefnyddwyr cyfrifol deimlo'n "drist iawn".

Mae cymdeithas adarwyr yn dweud bod angen rheolaeth lymach o ddefnydd beiciau dŵr, er mwyn atal problemau.

'Meddwl bod jetskiers i gyd fel 'na'

Mae adroddiadau diweddar ar gyfryngau cymdeithasol o feiciau dŵr yn amharu ar fywyd gwyllt.

Mae Chris Squires yn defnyddio beic dŵr ers 2015: "Mae rhywun yn gweld hwnna ac wedyn maen nhw'n târio pawb 'efo'r un brwsh.

"Mae rhaid i chi gofio ar unrhyw benwythnos fydd 'na gannoedd o jet skis ar y môr o gwmpas gogledd Cymru.

"Ond dim ond y snippets yna 'den ni'n gweld ac mae pobl yn meddwl bod jetskiers i gyd fel 'na, a tydan ni ddim."

Mae angen rheoli beiciau dŵr er mwyn diogelu adar môr, meddai'r BTO

Mae Mr Squires yn cydnabod fod problem delwedd gan feiciau dŵr.

Mae'n aelod o PWC Gwynedd, sydd â 3,000 o aelodau ac yn mynd ag aelodau newydd ar deithiau i'w dysgu am sut i ymddwyn ar y dŵr.

Mae hefyd eisiau i ragor wneud hyfforddiant y Royal Yacht Association, fel y gwnaeth o.

"Yn y cwrs yna, maen nhw'n dysgu'r ffordd iawn i handlo'r peiriant ac yn dysgu sut i barchu'r amgylchedd."

• Afon Menai: Gŵr gweddw yn pledio am beidio cyfyngu

• Cynnig mesur i reoli beicio sgïo dŵr

Dywedodd llefarydd o'r Royal Yacht Association eu bod wedi eu "tristáu" o glywed am ymddygiad honedig rhai beiciau dŵr.

"Tra'n bod ni'n annog pobl i wneud ein cyrsiau hyfforddiant, rydym yn derbyn bod dulliau eraill i bobl ddod yn ddefnyddwyr cyfrifol. Dydyn ni ddim o blaid gwneud ein cyrsiau'n orfodol.

"Mae'n llawn mor bwysig gweithio gyda phartneriaid fel y gymuned beiciau dŵr, awdurdodau lleol a'r heddlu i dynnu sylw at ymddygiad gwrth-gymdeithasol pan fo'n digwydd."

Kelvin Jones ydy Swyddog Datblygu cymdeithas adarwyr y British Trust of Ornithologists (BTO).

Dydy o ddim wedi gweld yr ymddygiad sy'n cael ei ddisgrifio ar wefannau cymdeithasol ei hun, ond mae o eisiau gweld gwell rheolaeth ar feiciau dŵr.

"Mae o fyny i'r cynghorau rŵan i wneud yn siŵr bo' rhaid i ti lansio o'r un llefydd, bo' gen ti yswiriant i gyfro dy hun, bo' ti 'di bod ar gwrs hyfforddi a bo' ti'n gw'bod be' ti'n 'neud."

"Os fedran ni adnabod y bobl sy'n creu'r problemau, fedrwn ni wneud rhywbeth amdano fo.

"Ond fel mae hi rŵan does na'm ffordd o wybod."

'Amhosib' rheoli pawb

Y Cynghorydd Carwyn Jones ydy deilydd portffolio Datblygu Economaidd Cyngor Ynys Môn.

Mae'n dweud bod 100 o lithrfeydd yn rhoi mynediad i'r môr ar Ynys Môn a'i bod hi'n "amhosib" i reoli pob un.

"'Den ni'n addysgu pobl, 'den ni'n rhoi rheolau yn eu lle. 'Den ni rhoi disgownt i bobl sydd wedi eu hyfforddi cyn mynd ar y Fenai.

"Felly 'den ni yn gwneud lot o bethau. Ond hefyd mae isio deddfwriaeth gwlad."