Perchennog cŵn gafodd eu dwyn yn troi'n dditectif

Mae Jane Jenkins wedi disgrifio ei chŵn fel "ei bywyd"

Mae menyw wedi cymryd rôl ditectif ar ôl gweld llun o'i chi ar werth 200 o filltiroedd i ffwrdd mewn hysbyseb ar-lein.

Mae Jane Jenkins o Abertawe'n credu i ddau o'i chŵn gael eu dwyn ar gyfer bridio.

Ar ôl chwilio trwy hysbysebion ar-lein, fe ddaeth o hyd i'w chi bach labrador, Arthur, ond doedd dim golwg o'i llamgi (cocker spaniel), Bandit.

Mae ymchwil yn awgrymu bod y farchnad bridio cŵn werth bron i £500m y flwyddyn.

Mae Ms Jenkins yn credu y gallai'r lladron sydd â'i chi bach llamgi ennill degau o filoedd o bunnoedd trwy fridio cŵn bach a'u gwerthu i gwsmeriaid ar-lein.

• Darganfod dros 80 o gŵn sydd 'wedi eu dwyn'

• Carcharu bridiwr am dorri clustiau cŵn bach

Cafodd Bandit (chwith) ac Arthur eu dwyn fis Ionawr diwethaf

Er gwaethaf mesurau diogelwch, llwyddodd lladron i dorri mewn i gytiau cŵn Ms Jenkins fis Ionawr diwethaf.

Roedd Ms Jenkins a'i brawd adref pan sylwon ar gerbyd amheus yn gyrru ar hyd y lôn ar gamera diogelwch.

"Wrth inni redeg arall, roedd yr olwynion yn troi ar y gwair ac roedden nhw wedi mynd," dywedodd Ms Jenkins.

Dechreuodd Heddlu De Cymru ar ymchwiliad gan ddiweddaru Ms Jenkins ar unrhyw ddatblygiadau.

Ond, dechreuodd Ms Jenkins, a ddisgrifiodd eu cŵn fel "eu bywyd", eu hymchwiliad ei hun ar-lein.

Daeth Ms Jenkins o hyd i Arthur mewn cartref 200 milltir i ffwrdd yng Nglannau Mersi

Treuliodd oriau bob diwrnod yn chwilota trwy hysbysebion ac yn apelio ar bobl ar y cyfryngau cymdeithasol.

Ym mis Mawrth, derbyniodd Ms Jenkins negeseuon testun a lluniau o hysbyseb ar-lein yn cynnig ci bach labrador ar werth yng Nglannau Mersi.

"Dw i wedi edrych ar filoedd o gŵn bach labrador, fe oedd yr un cyntaf lle feddyliais, ie, fe yw hwnna," dywedodd.

"Doeddwn i'n methu credu ei fod e yng Nglannau Mersi."

Cafodd y ci ei ddychwelyd adref ar ôl i Heddlu De Cymru a Glannau Mersi gadarnhau mai ci Ms Jenkins, Arthur, oedd y ci yn yr hysbyseb.

Cafodd dyn, a oedd yn byw yn y tŷ lle'r oedd y ci, ei arestio ond yna'i ryddhau heb gyhuddiad ar ôl dweud wrth swyddogion ei fod wedi prynu'r ci oddi wrth rywun arall.

Mae Jane yn disgrifio'i chi bach llamgi, Bandit, fel "rhan o'i theulu"

Ond bron i flwyddyn yn ddiweddarach, mae Bandit yn dal ar goll ac mae Ms Jenkins yn poeni bod ei chi wedi cael ei gorfodi i eni cŵn bach gan fridwyr anghyfreithlon.

"Mae Bandit yn rhan o fy nheulu. Does gen i ddim plant. Felly dw i'n cyfeirio at y cŵn fel fy mhlant, fy nheulu.

"Dyw nhw [y lladron] ddim yn caru anifeiliaid. Maen nhw'n gwneud hyn ar gyfer arian.

"Alla i ddim deall sut all rywun fod mor greulon i rywbeth sydd â churiad calon."

Posteri Jane Jenkins wrth iddi geisio dod o hyd i'w chŵn

Mae negeseuon Ms Jenkins gyda'i hapêl i ddod o hyd i Bandit wedi eu rhannu gannoedd o filoedd o weithiau ar gyfryngau cymdeithasol.

"Dw i'n ei chael hi'n anodd... dw i'n gweithio saith diwrnod yr wythnos fel robot a gofalu am fy mam heb ddangos iddi faint mae fy nghalon yn torri," dywedodd.

Ym mis Awst, roedd Ms Jenkins yn meddwl ei bod gam yn nes at ddod o hyd i Bandit mewn hysbyseb yn ne ddwyrain Lloegr.

Ond pan aeth Ms Jenkins at yr heddlu, daeth i'r amlwg bod y cyfeiriad a ddefnyddiodd y gwerthwr yn ffug.

Mae Bandit yn dal ar goll bron i flwyddyn wedyn

Mae'r nifer o hysbysebion ar lein wedi cynyddu'n aruthrol ers dechrau'r pandemig.

Tra bod nifer o fridwyr a thrwydded ac yn gyfrifol, mae'r farchnad ar-lein yn cael ei defnyddio gan nifer o fridwyr anghyfreithlon.

Dyblu mewn gwerth

Mae ymchwil gan BBC Wales Investigates yn awgrymu bod cynnydd o 71% yn y nifer o hysbysebion a ymddangosodd ar ddau o'r gwefannau gwerthu mwyaf poblogaidd.

Cynyddodd nifer yr hysbysebion o 197,000 yn 2019 i 337,000 yn 2021.

Mae rhai mathau o gŵn yn ymddangos i fod wedi dyblu mewn gwerth dros y ddwy flynedd diwethaf.

Cynyddodd cyfanswm gwerth y cŵn a gafodd eu hysbysebu - ar ddwy wefan boblogaidd yn unig - o £153m ar hysbysebion i £486m.

Dywedodd Heddlu De Cymru bod pedwar dyn a dwy fenyw o Gastell Nedd Port Talbot wedi eu harestio mewn cysylltiad â lladrad ci Ms Jenkins.

Maent bellach wedi eu rhyddhau dan ymchwiliad.

Dywedodd llefarydd y dylai unrhyw un sydd â gwybodaeth gysylltu â'r llu.