Canslo cardiau melyn cyn gemau ail gyfle Cwpan y Byd

Roedd saith o chwaraewyr Cymru un cerdyn melyn o golli'r rownd derfynol pe bai Cymru'n cyrraedd yno

Mae FIFA wedi penderfynu canslo'r cardiau melyn oedd gan chwaraewyr rhyngwladol cyn gemau ail gyfle Cwpan y Byd Qatar ym mis Mawrth.

Roedd saith o chwaraewyr Cymru mewn perygl o golli rownd derfynol y gemau ail gyfle pe bydden nhw wedi cael cerdyn melyn a Chymru'n ennill yn y rownd gynderfynol.

Y chwaraewyr hynny oedd Aaron Ramsey, Chris Gunter, Harry Wilson, James Lawrence, Joe Allen, Kieffer Moore a Sorba Thomas.

Dywedodd Cymdeithas Bêl-droed Cymru fod FIFA wedi penderfynu canslo'r cardiau melyn yn dilyn cais gan y corff sy'n gyfrifol am bêl-droed Ewropeaidd, UEFA.

• Cymru i wynebu Awstria yng ngêm ail gyfle Cwpan y Byd

• Gêm ail gyfle i ddigwydd yn Stadiwm Dinas Caerdydd

• Gemau ail gyfle Cwpan y Byd: Beth yw gobeithion Cymru?

Bydd y gemau tyngedfennol i gyrraedd Cwpan y Byd yn Qatar yn cael eu cynnal ar ddydd Iau, 24 Mawrth a dydd Mawrth, 29 Mawrth.

Pe bai Cymru'n llwyddo i drechu Awstria yn y rownd gynderfynol yng Nghaerdydd, fe fyddai un ai'r Alban neu Wcrain yn cael eu croesawu i'r brifddinas ar gyfer y rownd derfynol.