Cymru i wynebu Awstria yng ngêm ail gyfle Cwpan y Byd

Awstria fydd gwrthwynebwyr Cymru yn rownd gynderfynol y gemau ail gyfle i geisio sicrhau lle yng Nghwpan y Byd 2022 yn Qatar.

Cafodd yr enwau eu tynnu o'r het mewn seremoni yn Zurich brynhawn Gwener.

Gan fod tîm Rob Page ymhlith y prif ddetholion, Cymru sydd â'r fantais o gael chwarae gartref.

Bydd y gêm yn cael ei chynnal yng Nghaerdydd ar 24 Mawrth.

• Edrych yn ôl: Yr enwau o'r het ar gyfer y gemau ail gyfle

Ar hyn o bryd mae Cymru'n 19eg yn rhestr detholion FIFA, tra bod Awstria yn y 30ain safle.

Bydd yr enillwyr yn wynebu'r Alban neu Wcrain yn y rownd derfynol ar 29 Mawrth.

Petai Cymru yn curo Awstria, fe fyddai'r gêm derfynol yn erbyn Yr Alban neu Wcrain yng Nghaerdydd.

Sicrhaodd Cymru eu lle yn y gemau ail gyfle ar ôl gorffen yn ail i Wlad Belg yn eu grŵp rhagbrofol.

Dim ond teirgwaith mewn 10 gêm y mae Cymru wedi trechu Awstria - ond mae dwy o'r buddugoliaethau hynny wedi dod yn y blynyddoedd diwethaf.

Fe enillodd y crysau cochion o 2-1 mewn gêm gyfeillgar yn 2013, a chyfartal 2-2 oedd hi yn Vienna yn 2016, cyn i gôl Ben Woodburn sicrhau buddugoliaeth yng Nghaerdydd yn 2017 ar y daith aflwyddiannus i Gwpan y Byd 2018.

Mae'r record ddiweddar yn erbyn Yr Alban yn ffafrio Cymru, sydd ond wedi colli unwaith mewn wyth gêm - fe wnaethon nhw ennill ddwywaith yn eu herbyn nhw yn ymgyrch Cwpan y Byd 2014.

Dim ond tair gwaith y mae Cymru a'r Wcrain wedi chwarae ei gilydd, gyda'r crysau cochion yn cael dwy gêm gyfartal ac yna colli mewn gêm gyfeillgar yn 2016.