Shane Williams: 'Fy hoff geisiau Chwe Gwlad'

Fe wnaeth Shane Williams sgorio 58 cais mewn 87 gêm dros Gymru rhwng 2000-2011

Mae gan bob cefnogwr rygbi ei hoff gais o gemau Pencampwriaeth y Chwe Gwlad - ond beth ydi dewis y chwaraewr sydd wedi sgorio'r nifer fwyaf o geisiadau erioed i Gymru?

Mae cyn asgellwr Cymru a'r Llewod Shane Williams newydd fod ar daith o gwmpas chwe dinas y gystadleuaeth gyda'i arwr, cyn asgellwr Cymru a'r Llewod Ieuan Evans, i ffilmio 6 Gwlad Shane ac Ieuan i S4C.

Felly wrth i ni edrych ymlaen at gêm agoriadol pencampwriaeth 2022, Cymru Fyw fu'n holi Shane Williams am ei hoff geisiau i gael eu sgorio ymhob dinas.

Rhedeg ym Mharis... Ieuan Evans a Shane Williams yn hel atgofion o chwarae ym mhrif ddinas Ffrainc wrth ffilmio 6 Gwlad Shane ac Ieuan - sydd ar gael i'w wylio ar iPlayer ac ar S4C Clic

Dulun

Jonathan Davies, Cymru v Iwerddon, 2012

George North a Mike Phillips yn llongyfarch y canolwr Jonathan Davies wedi iddo sgorio cais i Gymru

"Dyma'r Chwe Gwlad cynta' ar ôl i fi reteiro gyda Cymru, a'n Chwe Gwlad cynta' i gyda ITV yn sylwebu. Dweud y gwir do'n i ddim yn hapus ar y penwythnos yna - ro'n i'n gwylio'r gêm, y gynta' yn y Chwe Gwlad, a dal i feddwl os oedd blwyddyn arall yng ngharfan Cymru 'da fi, felly roedd e'n Chwe Gwlad galed i fi.

"Ond fi'n cofio George North yn torri llinell Iwerddon a mynd trwyddo a roddodd e cat flap pass i Jonathan Davies, wnaeth sgorio wedyn jest i'r dde o'r pyst. Roedd hynny wedi cheerio fi lan tipyn bach.

"Falle dyw hwn ddim y cais gorau i ni weld yn stadiwm Aviva, ond i fi yn bersonol roedd e'n neis i weld George yn cadw'r crys 11 i fynd (sef rhif Shane Williams cyn ymddeol) a gyda'r hyder i ddadlwytho'r bêl i Jonathan Davies fedru sgorio'r cais - ac wrth gwrs aeth Cymru ymlaen i ennill y gêm ac ennill y Chwe Gwlad hefyd."

Gwyliwch Jonathan Davies yn sgorio (1.42 i mewn):

• Mynd draw i Ddulun ar gyfer gêm gyntaf Cymru? Darllenwch Taith o gwmpas cysylltiadau Cymreig Dulyn

Paris

Wesley Fofana, Ffrainc v Lloegr, 2013

Wesley Fofana yn chwarae i Clermont cyn cael ei ddewis i chwarae dros ei wlad am y tro cyntaf yn 2012

"Fi'n credu'r flwyddyn yna roedd Wesley Fofana yn un o'r chwaraewyr gorau yn y byd. Fi wastad yn cofio'r cais yna gan fod e wedi bron maeddu saith amddiffynnwr Lloegr a sgorio o tua 70 llath mas o'r llinell. Fi'n cofio fe hefyd achos o'n i ddim wedi clywed lot am Wesley Fofana ar ôl y cais yna - roedd e wedi cwympo bant o'r radar tipyn bach.

"Gwylio'r gêm ar y teledu o'n i, a ro'n i'n ffan o Wesley Fafana. Oedd e'n chwaraewr tipyn gwahanol i fi - rhedeg yn syth a falle ddim y traed gorau yn y byd ond fi'n cofio'r cais 'ma, fel oedd e'n mynd heibio chwaraewyr Lloegr a defnyddio'r traed a chryfder yn y diwedd i sgorio'r cais o dri chwarter hyd y cae fi'n credu."

Gwyliwch gais Wesley Fofana:

Rhufain

Scott Williams, Eidal v Cymru 2015

Scott Williams

"Roedd hwn yn gêm eitha' clos hanner amser ond wedyn ail hanner rhedodd Cymru i ffwrdd gyda'r gêm, a'r cais olaf oedd un Scott Williams. Redodd Cymru'r bêl o linell eu hunain. Jonathan Davies yn gynta', wedyn dadlwytho mas o'r tacl ac wedyn Gareth Davies fi'n credu yn dilyn ar y dde a Scott Williams yn gorffen e bant. Roedd e'n gais arbennig ac un o'r ceisiau gorau fi 'di gweld Cymru yn sgorio deud y gwir - a gweld cais fel yna yn fyw hefyd.

"Ro'n i fod ar y ffens gan mod i'n gweithio ar y gêm yn sylwebu ond fi'n cofio dathlu'r cais yna. Mae'n galed iawn i aros ar y ffens - fi'n cefnogi Cymru ers yn chwe blwydd oed felly pan maen nhw'n neud yn dda mae'n galed i beidio gwenu."

Gwyliwch gais Scott Williams yn erbyn yr Eidal yn Rhufain:

Caerdydd

Shane Williams, Cymru v Yr Alban 2010

Shane Williams yn croesi'r llinell i sgorio'r cais yn erbyn yr Alban yn 2010

"Fi wedi bod tipyn bach yn selfish achos mae un yn sticio mas fwy na ceisiau eraill sef cais fi yn erbyn Alban 2010… cais sgories i yn eiliad ola'r gêm. Fi wedi dewis e achos pan mae pobl yn siarad am y stadiwm yng Nghaerdydd, maen nhw wastad yn sôn am y gêm yna yn erbyn yr Alban.

"Mae lot o bobl wedi dweud "cerddes i mas jest ar ôl hanner amser yn meddwl bod y gêm drosodd, roedda ni yn Walkabout neu Tiger Tiger (bar a chlwb nos yng Nghaerdydd) neu ble bynnag a jest clywed y sgrechen o'r stadiwm.

"Mae pobl wastad yn siarad am y gêm yna ac mae e wastad yn sticio 'da ni hefyd achos pryd ma'r bois yn siarad am y gêm yna y gair ma' nhw'n defnyddio yw bonkers.

"Fi'n cofio yn yr hanner gynta' roedden ni'n rubbish - Cymru yn rubbish, fi'n rubbish yn bersonol, y bois yn edrych wedi blino a'r Alban yn lot gwell na ni, a fi jest yn cofio agwedd y bois yn yr ail hanner, byth roi lan, sticio i'r game plan a chadw fynd reit at y funud ola' a sgorio'r cais 'na. Sai byth wedi anghofio hynny - a hefyd dyw pawb fi'n siarad gyda nhw ddim yn gadael i fi anghofio fe chwaith."

Ail-fyw y gais y wers o'r gais yn eiliadau ola'r gêm:

• Gerald Davies: Camp Lawn 1971 ac 'asgellwyr arbennig' heddiw

Llundain

Scott Williams, Lloegr v Cymru 2012

"Eto ro'n i'n gweithio yn y gêm yn Twickenham yn sylwebu a fi'n cofio roedd hi'n gêm gyfartal (12-12) ac aeth Scott Williams trwyddo'r sgarmes a dwgodd e'r bêl gan Courtney Laws a gorffennodd e cais reit ar ddiwedd y gêm i ennill y gêm.

"Sai'n cofio lot o gemau nôl yn y dydd, rhai o'n i'n chwarae ynddyn nhw, ond fi'n cofio ble o'n i pan sgoriodd Scott Williams - ac aeth Cymru ymlaen wedyn i ennill y Gamp Lawn.

"Fi'n cofio'r gêm yna hefyd achos ro'n i'n eistedd pitchside ac roedd Gareth Edwards tu ôl i fi gyda Robbie Savage ac am y gêm gyfan roedd Gareth Edwards yn dweud wrth Robbie Savage beth oedd yn mynd 'mlaen felly roedd clust tost gan Robbie Savage ar ôl y gêm.

"Fi'n hoffi gweithio pitchside - fi'n gallu eistedd gyda'r cefnogwyr a fi'n licio hynny - y canu a'r dathlu."

Cais Scott Williams yn erbyn Lloegr:

Caeredin

Sean Maitland, Alban v Lloegr 2018

Sean Maitland yn sgorio yn erbyn Lloegr yn 2018

"Fi'n cofio'r cais yma achos ges i e-bost gan World Rugby yn gofyn beth oedd y ceisiau gorau o dymor 2018 a fi'n cofio dweud roedd cais Maitland yn un o'r ceisiau gorau fi wedi gweld.

"Sgoriodd e reit yn y gornel, eto yn erbyn Lloegr - fi'n pigo lot o geisiau yn erbyn Lloegr sai'n gwybod pam! - ond fi jest yn cofio bod e'n cais arbennig a jest yn dangos beth mae tîm yr Alban yna yn gallu 'neud pan yn dadlwytho pêl mas o dacl, efo chwaraewyr fel Stuart Hogg a Hugh Jones a bois fel hyn - olwyr arbennig, a Maitland hefyd wrth gwrs, yn Llewod.

"Ro'dd jest y ffordd wnaeth nhw sgorio'r cais efo rhan fwya' o'r olwyr, a mynd o un ochr y cae i'r ochr arall ac wedyn o'r ochr dde i'r chwith yn y diwedd i Maitland sgori - cais arbennig."

Gwyliwch gais Sean Maitland: