Llyfrgell Pwllheli'n ailagor wedi adnewyddiad £900,000

Mae'r fynedfa newydd wedi ei dylunio i fod yn ofod ar gyfer ymlacio a chymdeithasu

Mae Llyfrgell Pwllheli wedi ailagor ei drysau ddydd Llun ar ôl adnewyddiad gwerth £900,000 ar Neuadd Dwyfor.

Mae'r gwaith i ddiweddaru ac uwchraddio'r llyfrgell a'r cyfleusterau theatr a sinema wedi cymryd bron i flwyddyn.

Mae'r gwelliannau gan y perchnogion - Cyngor Gwynedd - hefyd yn cynnwys cyfleuster toiled hygyrch ar y llawr gwaelod, yn ogystal â'r fynedfa - sydd wedi ei dylunio i fod yn ofod ar gyfer ymlacio a chymdeithasu.

Fe fydd defnyddwyr yn gallu cael mynediad at lyfrau llyfrgell a chyfrifiaduron hunanwasanaeth, a bydd y bar coffi yn weithredol yn ystod prynhawniau unwaith y bydd ffilmiau yn ailddechrau.

Bydd y theatr a'r sinema ar agor yn yr wythnosau nesaf, a'r llyfrgell yn symud i oriau agor estynedig.

Mae'r gwaith adnewyddu yn Neuadd Dwyfor wedi cymryd bron i flwyddyn

Dywedodd Maer Pwllheli, Mici Plwm, fod yr ardal wedi cymryd mantais o'r pandemig i wneud gwelliannau i'r adeilad.

"Mae'r aflwydd 'ma wedi bod o gwmpas ers dwy flynedd, ond mae Pwllheli wedi manteisio arno fo drwy adnewyddu a gwneud gwelliannau enfawr yma," meddai.

"Ma' Neuadd Dwyfor bellach - fysa chi'n gallu ei galw hi'n theatr. Mae'r adnoddau yna i bob dim - ffilmiau, dawns, corau.

"Y gri fawr wrth gwrs i drigolion tref Pwllheli a Phen Llŷn gyfan ydy cefnogwch o - cefnogwch o i'r carn.

"O'i ddefnyddio fo, fydd o'n mynd o lwyddiant i lwyddiant."

Mae Mici Plwm a Gwenan Gibbard yn awyddus i weld y neuadd yn mynd o nerth i nerth

Ychwanegodd y delynores Gwenan Gibbard, sydd wedi perfformio yn y neuadd sawl gwaith: "Mae gan bawb eu hatgofion am Neuadd Dwyfor, neu Neuadd y Dref fel oedd hi ers talwm.

"Mae'r neuadd wedi bod yn rhyw ganolbwynt i ddiwylliant a'r celfyddydau yn ardal Dwyfor ers degawdau erbyn hyn, ac mae 'na hen edrych 'mlaen am iddi ailagor.

"Mae pethau'n rhyw ddechrau ailgychwyn rŵan o ran perfformio ac yn y blaen, ac mae cael mynediad at y celfyddydau fel hyn ar ein stepen drws yn ysgogiad, ac mae'n braf iawn cael neuadd o safon."