Côrdydd yn fuddugol yng nghystadleuaeth Côr Cymru 2022

Côrdydd yw côr buddugol cystadleuaeth Côr Cymru 2022

Côrdydd yw pencampwyr cystadleuaeth Côr Cymru 2022.

Dan arweiniad Huw Foulkes, mae'r côr yn derbyn tlws a gwobr ariannol o £4,000.

Dyma'r degfed tro i'r gystadleuaeth gael ei chynnal ers cael ei sefydlu yn 2003 - a chael ei gohirio oherwydd Covid-19 y llynedd.

Roedd pump côr yn cystadlu yn y rownd derfynol nos Sul yng Nghanolfan y Celfyddydau, Aberystwyth.

CF1, Côr Ieuenctid Môn, Johns' Boys, Côr Heol y March a Côrdydd oedd wedi hawlio eu lle ar ôl mynd drwodd o'r rowndiau cynderfynol.

'Ysbrydoledig'

Yn ôl Wyn Davies, un o'r beirniaid, cafodd y panel eu "hysbrydoli" gan y gystadleuaeth ac un o'r uchafbwyntiau oedd "teimlo'r parch rhwng y corau".

Wrth gyhoeddi mai Côrdydd oedd y côr buddugol, dywedodd fod y beirniaid yn "hollol gytûn" ar eu penderfyniad.

Mae Côrdydd yn derbyn tlws a gwobr ariannol o £4,000

Dywedodd y beirniad answyddogol, Catrin Hughes, fod y pump côr wedi "rhoi ias a gwefr a gwledd" ar y noson.

"Mae dyfodol canu corawl Cymru yn hollol, hollol ddiogel," dywedodd.

Rhoddwyd gwobr arall hefyd am yr arweinydd gorau i Rachel Blair, arweinydd Côr Ysgol Penglais, am "ei gwaith ysbrydoledig".

Fe ganodd Amelia Anisovych, merch 7 oed o Wcráin, yn ystod y gystadleuaeth

Yn ogystal â pherfformiadau'r corau o Gymru, cafwyd perfformiad arbennig gan ferch fach 7 oed o Wcráin.

Cafodd fideo o Amelia Anisovych yn canu mewn lloches yn Wcráin ei rannu ar y cyfryngau cymdeithasol ar draws y byd.

Fe deithiodd i Aberystwyth er mwyn canu cân 'Let it Go' a'r anthem genedlaethol ar lwyfan Côr Cymru ac ar S4C.